Наманган вилоятида қидирувга берилган бола Тошкент вилоятининг Янгийўл туманидаги дала майдонидан топилди. Бу ҳақда МИБнинг Чуст туман бўлими хабар берди.
Маълум қилинишича, фуқаролик ишлари бўйича Чуст туманлараро судининг апрелдаги ижро варақасига асосан, даъвогор Х.М. фойдасига жавобгар Р.М.дан 6 ёшли фарзандини олиб бериш белгиланган.
“Бўлим иш юритувига олинган мазкур ҳужжат ижросини таъминлаш мақсадида жавобгарга ихтиёрий муддат берилган. Лекин қарздор фарзандини бергиси келмай, суд ҳукмини ихтиёрий бажаришдан бош тортган. Ота болани онасига бермаслик мақсадида бошқа вилоятга олиб кетиб, яшириб юрган.
Бошқарма ходимлари томонидан қидирув эълон қилиниб, кузатув ишлари олиб борилди. Олиб борилган тадбир давомида болакай Тошкент вилоятининг Янгийўл туманидаги фермер хўжалиги майдонида вақтинчалик ишлаш учун борган жойдан топилди”, — дейилади МИБ ахборотида.
Айни вақтда бола ўз онасига топширилган.
