Бироз аввал 2005 йилда туғилган вояга етмаган Н.О исмли қиз 2023 йил 23 март куни Риштон туман марказий истироҳат боғидаги "Қароқчилар кемаси" номли аттракционда учаётиб, эҳтиётсизлик оқибатида тушиб кетгани ҳақида хабар берган эдик.
Ҳолатга Саноат хавфсизлиги давлат қўмитаси ҳам муносабат билдирди.
Тоғ-кон, геология ва саноат хавфсизлигини назорат қилиш инспекцияси ходимлари томонидан ҳолат юзасидан ўтказилган ўрганиш натижасида “Қароқчилар кемаси” аттрациони қўлбола усулда ясалган бўлиб, 2022 йил июлда тадбиркор И.Т томонидан ўзбошимчалик билан ўрнатилгани аниқланди.
Мавжуд талабларга кўра аттрацион махсус ихтисослаштирилган ташкилот томонидан ўрнатилиши лозим. Шунингдек, аттрационнинг техник паспорти мавжуд эмас, статик ва динамик синовлардан ўтказилмаган, кунлик техник назорат, аттрацион электр жиҳозларини ерга заминлаш ва изоляцияси қаршилигини ўлчаш, ишга тушириш ва созлаш ишлари бажарилмаган. Аттрационга 2022 йил август ойида мавсум учун махсус лаборатория томонидан металл конструкциясининг мустаҳкамлиги тўғрисида ижобий хулоса берилган бўлсада, шу кунгача аттрациондан тегишли рухсатнома олинмасдан фойдаланилган.
