Давлат хавфсизлиги хизмати ходимлари 3 та вилоятда коррупцияга йўл қўйган фирибгар мансабдорларни қўлга олди. Бу ҳақда ДХХ ахборот хизмати Darakchi.uz'га маълум қилди.
Жумладан, Самарқанд давлат ветеринария медицинаси, чорвачилик ва биотехнологиялар университетининг Тошкент филиали мансабдор шахси фуқарони бўлим бошлиғи лавозимига қабул қилиш ва илмий ишини ҳимоя қилишида ёрдам бериш эвазига 10 минг АҚШ доллари олган вақтида ушланди.
Шунингдек, Фарғонада Ўзбекистон тумани тиббиёт бирлашмасининг реанимация бўлими мансабдор шахси фуқаронинг ишончига кириб, унга нисбатан Тошкент шаҳар Учтепа тумани ИИО ФМБ Тергов бўлими томонидан қўзғатилган жиноят ишини танишлари орқали унинг фойдасига ҳал қилиб бериш эвазига 10 минг АҚШ доллари олган вақтида ушланди.
Бундан ташқари, Наманган вилояти Уйчи тумани ҳокимлиги юристконсульти фирибгарлик йўли билан маҳаллий фермер хўжалик раҳбаридан 5 минг АҚШ доллари олган вақтида ушланди.
02.03.2023 10:28
⚡️ДХХ коррупция ва фирибгарлик билан шуғулланган мансабдорларни қўлга олди (видео)
