Ўзбекистонда хизмат кўрсатган артист Раъно Шодиева Ҳиндистоннинг Мумбай шаҳрида бўлиб ўтган Шанхай ҳамкорлик ташкилоти (ШҲТ)га аъзо давлатларнинг бадиий ва телевизион фильмлари фестивали (NFDC) нинг “Энг яхши аёл образи” номинацияси ғолиблигини қўлга киритди. Бу ҳақда Кинематография агентлиги Ахборот хизмати хабар берди.
Ўзбекистон Республикаси Кинематография агентлиги, “Central Asian Trade Company” (CATC) ҳамда “Dilshoh media” киностудиялари ҳамкорлигида суратга олинган “Аёл қисмати” бадиий фильми ҳаётда содир бўлган реал воқеликларга асосланган.
Кинокартина Президенти топшириғига кўра 2019-2020 йилларда амалга оширилган инсонпарварликнинг энг олий намунаси бўлмиш “Меҳр” операцияси доирасида Суриядан олиб чиқилган юзлаб аёллардан бири - Сожиданинг аянчли тақдирини жуда таъсирли тарзда экранда гавдалантирган.
“Бу кичкина меҳнат дея олмайман, катта меҳнат қилдик. Лекин бу меҳнатнинг мана бундай ёқимли дақиқалари бўлади, мен бундан жуда ҳам хурсандман. Конкурсга қўйилган барча фильмлар жуда юксак даражадаги картиналар эди, унда роль ижро этган актёрлар ҳам жуда истеъдоли, маҳоратли, лекин уларнинг орасидан мени танлашганидан бошим осмонга етди. Бу нафақат менинг, балки бутун гуруҳимизнинг ютуғи. Ушбу фестивалдаги 8 та совриндан бири бизга насиб этди, демак бу бутун ўзбек киносининг ҳам ютуғи . Бундай эътирофлар ижодкор учун керак. Яна ва яна яхши ижод қилиш учун қандайдир бир илҳом беради санъаткорга", - дейди Раъно Шодиева.
Маълумот учун, “Аёл қисмати” бадиий фильми Туркиянинг Бурса шаҳрида бўлиб ўтган “2-Қўрқут ота” кинофестивалида “гран при”ни қўлга киритган ҳамда Ўзбекистонда хизмат кўрсатган артист Раъно Шодиева ҳакамлар ҳайъатининг махсус мукофотига сазовор бўлган эди.
Шунингдек, 2022 йил 24 декабрда бўлиб ўтган Олтин Хумо” Миллий кино тақдимотида ҳам Раъно Шодиева “Энг яхши аёл актриса” номинациясида ғолиб бўлган.
