Бугун, 17 январь Тошкент шаҳрининг Сергели туманида электр трансформатор ёниб кетди. Бу ҳақда шаҳар Фавқулодда вазиятлар бошқармаси маълумот берди.
Хабарда айтилишича, соат 17:43 да Сергели-5 даҳаси 25-уй олдида жойлашган ТП40-44 рақамли трансформаторда ёнғин бўлаётганлиги ҳақида ФВБнинг тезкор бошқарув марказига хабар келиб тушган. Шунга кўра, воқеа жойига бирламчи ёнғин-қутқарув техникалари 17:51 да етиб борган ҳамда 17:58 да ёнғин тўлиқ бартараф этилган.
Ҳодиса оқибатида трансформаторнинг ички қисми ёниб зарарланган.
Шунингдек, соат 18:44 да пойтахтнинг Шайхонтоҳур тумани “Жарариқ” мавзесидаги электр трансформаторда ҳам ёнғин содир бўлган.
Воқеа жойига бирламчи ёнғин-қутқарув техникалари соат 18:55 да етиб борган. Шундан сўнг маълум вақт ҳудуд электр тармоқлари ходимлари трансформаторнинг мавжуд электр тизимидан узганларидан сўнг соат 19:33 да ёнғин тўлиқ бартараф этилган.
