Ўзбекистонда мактаб ўқувчиларининг ўқув юкламалари камайтирилди. Бу ҳақда Санэпидхизмат Матбуот хизмати хабар берди.
Бу тартиб умумтаълим мактабларида таълим шароитлари ва ташкил этилишига қўйиладиган санитария-эпидемиологик талаблари (0341-16-сон СанҚваН) иловасига мувофиқ киритилган ўзгартиришлар ва қўшимчада акс этган.
Унга кўра, ҳафталик ўқув юкламасининг максимал даражасига бўлган гигиеник талаблар қуйидагича белгиланди:
- 1-синфлар учун — дарслар кунига 4 соатдан ва ҳафтада 2 кун 5 соатдан кўп бўлмаслиги керак (5 соатлик ўқув кунида жисмоний тарбия ёки енгил фанлар — технология, тасвирий санъат, мусиқа маданияти, тарбия фанлари ўқитилади). 1-синфлар учун дарс соатлари 1 ҳафтасига 22 соатдан ошмаслиги керак.
- 2 — 4-синфлар учун — дарслар кунига 4 соатдан ва ҳафтада 4 кун 5 соатдан кўп бўлмаслиги керак (5 соатлик ўқув кунида жисмоний тарбия ёки енгил фанлар — технология, тасвирий санъат, мусиқа маданияти, тарбия фанлари ўқитилади);
- 5 — 9-синфлар учун — дарслар кунига 6 соатдан кўп бўлмаслиги керак;
- 10 — 11-синфлар учун — дарслар кунига 6 соатдан кўп бўлмаслиги керак;
Бир йил давомида ўқув ҳафталиги 1-синфлар учун — 33 ҳафта, 2 — 11-синфлар учун 34 ҳафтадан ошмаслиги лозим.
