Мактаб ўқувчиси отасининг пулларини онлайн ўйин учун сарфлаб юборди. Бу ҳақда Ички ишлар вазирлиги Киберхавфсизлик маркази хабар қилди.
Маълум қилинишича, Сирдарё вилояти Сирдарё туманида яшовчи 2007 й.т., 8-синф ўқувчиси С.Ф.нинг ота-онаси ариза билан мурожаат қилиб, уларнинг фарзанди “PUBG” онлайн ўйини аккаунтини сотиб олиш учун банк карталаридан телеграм мессенжерида танишган номаълум шахсга 1 миллион сўмга яқин пулларни ўтказиб берганлиги, аммо пулларни қабул қилиб олган шахс ёзишмаларни ўчириб ташлаб аккаунтини тақдим этмаганлигини билдириб, пулларни қайтаришда ёрдам сўрашган.
Олиб борилган тезкор-қидирув тадбирлари натижасида, фирибгарлик йўли билан пулларни ўзлаштирган шахслар Андижон вилояти Андижон шаҳрида яшовчи, 2006 й.т., М.У. ва Э.Ҳ. биргаликда амалга оширганликлари аниқланган.
М.У. ва Э.Ҳ. вояга етмаган фуқароларга ўйин аккаунтини сотишни таклиф қилиб ўтказиб берилган пулларни ўз эҳтиёжлари учун ишлатиб юбориб бир қанча фирибгарлик жиноятларни амалга оширганликлари маълум бўлди.
М.У. ва Э.Ҳ.га нисбатан ЎзР. ЖКнинг 168-моддаси 3-қисми билан жиноят иши қўзғатилиб, тергов ҳаракатлари олиб борилмоқда.
