Наманган халқаро аэропортида қалин туман туфайли кўринишнинг пасайиб кетиши рейсларни қабул қилиш ва жўнатишини чеклаб қўйди. Бу ҳақда “Uzbekistan Airports” матбуот хизмати хабар қилди.
Маълум қилинишича, иккита рейс муқобил аэродромларга жўнатилди.
Хусусан, ноқулай об-ҳаво шароити туфайли “Uzbekistan Airways” авиакомпаниясининг Уфа-Наманган йўналиши бўйича HY9958 рейси маҳаллий вақт билан соат 07:15 да Тошкент аэропортига қўнди. Шунингдек, Jazeera Airways авиакомпаниясининг J9645 рейси (Қувайт — Наманган) ҳам пойтахт аэропортига йўналтирилди.
Кўринишнинг пастлиги Red Wings WZ1127 (Екатеринбург-Наманган) рейси кутиш зонасига юборилишига сабаб бўлди. Самолёт маҳаллий вақт билан соат 07:30 да белгиланган аэропортга қўниши керак эди.
“Uzbekistan Airways” авиакомпаниясининг HY9825 (Наманган-Сочи) ва HY9823 (Наманган-Уфа), шунингдек, Flydubai FZ781 (Дубай-Наманган) рейслари Наманган халқаро аэропортида об-ҳаво яхшилангунига қадар кечиктирилди.
