Бир неча кундан бери ижтимоий тармоқларда Сурхондарё вилояти Қизириқ туманида “Surxon Cotton Textile Cluster” МЧЖ ҳамда “П.Туропов” ва бошқа 13 нафар фермер хўжаликлари раҳбарлари ўртасидаги келишмовчиликлар ҳақида постлар айланмоқда.
Депутат Р.Кушербаевнинг маълум қилишича, ўз ерини ҳимоя қилаётган фермернинг ери ноқонуний равишда ҳокимиятнинг ёрдами билан "SURHON COTTON TEXTILE CLUSTER" MЧЖ кластерига олиб берилган.
Қайд этилишича, узоқ вақт қонуний курашлардан сўнг фермер Олий суд орқали ўз ерини қайтариб олиш ҳақида қарорга эришган. Аммо маҳаллий ҳокимлик томонидан қарор ижро этилмай, фермерга ўз ери қайтариб берилмай келинмоқда.
"Ҳокимият, ички ишлар ва бошқа идораларнинг кластерга "адвокатлик" қилаётгани, қонунларни тан олмай фермерга зўравонлик қилаётгани Ўзбекистонда фермерларга оид қонунлар амалда ишламаётланини кўрсатмоқда.
Бу ишдан кейин Ички ишлар вазирлиги Қизириқдаги ходимларини раҳбари билан бирга тўлиқ кластерга ишга ўтказворгани маъқул", - дейди депутат.
ИИВ Ахборот хизмати раҳбари Ш.Ғиёсовнинг қайд этишича, жорий йилнинг 18 ноябрь куни мазкур келишмовчиликлар очиқдан-очиқ жанжалга айланиб, воқеа иштирокчилари ўзларини трактор тагига ташлаш, бир-бирига ҳамда ўзгаларнинг транспорт воситаларига шикаст етказиш каби ҳаракатларни амалга оширганлар.
" Чақирувга асосан воқеа жойига етиб келган ҳудудий ички ишлар органлари ходимлари жамоат тартибини тиклаб, ҳуқуқбузарлик содир этган шахслар билан профилактик суҳбат ўтказганлар. Воқеа иштирокчиларининг барчасини ҳаракатларига ҳуқуқий баҳо берилади.
Ижтимоий тармоқларда тарқалаётган турли номақбул фикрларга барҳам бериш учун эслатиб ўтамиз, ички ишлар органлари ходимлари тадбиркорларнинг ёки фермерларнинг иш фаолиятига аралашиш ҳуқуқлари йўқ. Лекин мақсадидан қатъий назар жамоат тартибини бузилишига йўл қўйилмайди", - дейди Ш.Ғиёсов
