Ижтимоий тармоқларда “ўзбекистонликлар Россия тарафдами ёки Украина”, номли видеосўровнома тарқалди. Видеода аксарият респондентлар урушда Россия томонида эканини айтган.
Олий Мажлис Қонунчилик палатаси спикери ўринбосари Алишер Қодиров Телеграмдаги каналида мазкур видеога муносабат билдирди.
“Биз маънан, руҳан ва жисмонан жиддий жароҳатланган миллатмиз. Ё матонат ва сабр билан курашамиз, бу жароҳатдан қутилиб қаддимизни ростлаймиз ёки яна оғзи очиқ, оёқ-қўли шол мажруҳга айланамиз... Бу ҳақорат эмас, ҳақиқат”– деб ёзган “Миллий тикланиш” демократик партияси раиси.
Шунингдек, видеога бошқа жамоатчилик вакиллари ҳам муносабат билдирилган.
“Бу лавҳага ортиқча изоҳ шарт эмас, менимча. Бугунги замонавий дунёда сиёсий онг, сиёсий маданият, қолаверса, миллий ўзлик, деган тушунчалар бор. Шу маънода гапирадиган бўлсак, бизнинг жамиятда бу нарсалар бир томонлама тарвақайлаб кетганини айтиш мумкин. Одамларимиз Россия учун рус ватандошлариданам куйиниб Кремл сиёсати ёнини олишаётир... Бу нима, ҳамон эфири тўхтатилмаётган рус ОАВсининг “онг ювиш” амалиёти самарасими?”, – деб ёзади телеграмдаги “platforma.uz” канали.
Эслатиб ўтамиз, Россия ҳарбийлари жорий йилнинг 24 февраль куни Украина ҳудудига бостириб кирганди.
