Фуқаронинг мурожаатисиз давлат хизматларини "проактив" шаклда кўрсатиш амалиёти Ўзбекистонда илк маротаба Молия вазирлиги ҳузуридаги буджетдан ташқари Пенсия жамғармаси томонидан амалга оширилади.
Хусусан, 2022нинг йил октябрь ойидан бошлаб 18 ёшгача ногиронлиги бўлган болалар ва одамнинг иммунитет танқислиги вируси келтириб чиқарадиган касалликка чалинган 18 ёшгача болаларга" тўланадиган нафақаларни ҳамда парваришлаш нафақасини фуқаролардан ҳеч қандай мурожаат талаб этилмасдан "проактив шаклда тайинлаш тизими жорий этилмоқда.
Яъни, фуқаро нафақа тайинлаш учун бирорта давлат органига мурожаат қилмайди. Бунда, нафақа тайинлаш учун барча маълумотлар Молия вазирлиги ҳузуридаги буджетдан ташқари Пенсия жамғармаси томонидан тегишли вазирлик ва идораларнинг ахборот тизимларидан электрон шаклда олинади.
Маълумот учун, ушбу тартиб жорий қилиниши билан бир йилда ўртача 70 мингдан зиёд фуқароларнинг нафақа тайинлаш учун мурожаат қилиш амалиёти бекор қилинади ва ушбу ижтимоий тўловлар ахборот тизимларидан олинган маълумотлар асосида автомат равишда тайинланади.
Эслатиб ўтамиз, амалга киритилаётган мазкур тартиб бўйича ижтимоий ёрдамнинг замонавий механизмларини амалга оширишда янги ёндашувларни жорий этиш юзасидан Ўзбекистон Республикаси Президентининг 2022 йил 17 февраль куни "Ногиронлиги бўлган шахсларни ҳамда аҳолининг ижтимоий ҳимояга муҳтож қатламларини қўллаб-қувватлашнинг қўшимча чора- тадбирлари тўғрисида"ги ПФ-74-сон Фармони қабул қилинган.
Дилбар Абдунабиева.
