Бу ҳақда бугун АОКАда бўлиб ўтган Бош прокуратура ҳузуридаги Мажбурий ижро бюроси раҳбарияти иштирокидаги матбуот анжуманида сўз борди.
Тадбирда МИБ органлари фаолияти таҳлили, соҳадаги янгиликлар ва тизимга ахборот-коммуникация технологияларининг татбиқ этилиши юзасидан маълумот бериб ўтилган.
Қайд этилишича, Бюро ташкил топганидан буён ижро ишини юритиш соҳасида 77 трлн. сўмдан ортиқ ундирувлар амалга оширилиб, шундан давлат фойдасига 32 трлн.сўмга яқин маблағлар ундирилган .
Кўрилган чора-тадбирлар натижасида жорий йилнинг ўтган даврида жами ундирув 21,7 трлн. сўмни ташкил этди. Бу кўрсаткич ўтган йилнинг шу даврига нисбатан 10,4 трлн.сўм (92%) ошганлиги айтилади.
Бюро масъул ходимларининг идоравий ахборот тизимларини интеграция қилишда олиб борган ишлари натижасида қидирув соҳасидаги муаммоли бўлган 4555 нафар шахс, 3073 та автотранспорт воситалари топилган, шунингдек қарздорлардан 16 млрд. сўмдан ортиқ маблағар ундирилган.
Шунингдек бюронинг маълум қилишича, ижтимоий аҳамиятга эга бўлган ижро ҳужжатларига эътибор кучайтирилиши натижасида моддий ёрдамга муҳтож фарзандлар фойдасига 2,5 трлн. сўмдан ортиқ алимент пуллари етказиб берилган.
