Вилоятда бундай филиаллар сони 15тага етди.
Давлат хизматлари агентлиги Наманган вилояти бошқармаси томонидан аҳолига қулайлик яратиш мақсадида маҳаллаларда Давлат хизматлари марказларининг филиаллари ташкил этилмоқда. Бунда, олисда жойлашган қишлоқ ва овуллар танлаб олиниб, унга ёндош бўлган маҳалла аҳолисининг туман марказига бориб вақт ва ортиқча маблағ сарфлашган ҳолда хизматлардан фойдаланишига чек қўйилмоқда, дея маълум қилади агентлик.
Қайд этилишича, Норин туманининг олис қишлоқларидан бири “Норинкапа” ва унга ёндош бўлган 9 та маҳаллада 42 минг нафарга яқин аҳоли истиқомат қилади. Аҳоли деҳқончилик ва чорвачилик билан шуғулланади. Аҳолининг туман марказига бориб келиши учун сарфлаган 20 километрлик йўли ва вақти тежаладиган бўлди. Бунинг учун эса, туман Давлат хизматлари марказининг “Норинкапа” филиали қишлоқ аҳлига хизмат кўрсатиш учун ўз эшикларини очган.
"Норин марказига бориш учун биз нуронийларга анча қийин. Давлат хизматлари маркази ходимлари маҳалламизга сайёр хизмат кўрсатиш учун келганларида бизнинг маҳаллада ҳам филиал очиш таклифини берган эдик. Бизнинг мурожаат масъуллар томонидан ўрганилиб, қишлоқда марказ филиали иш бошлади. Мана энди ёш-қари хизматдан фойдаланиш учун узоққа югурмайди. Шундоққина маҳалла биносидан хизмат олиши мумкин",- дейди норинкапалик нуроний Баҳодир Шодмонов.
