Ўзбек футболининг энг ёрқин юлдузларидан бири, узоқ йиллар давомида миллий терма жамоамизда бетакрор ўйинлар ўтказган Одил Аҳмедов футболчилик фаолияти якунланганини эълон қилди. Бу ҳақда Ўзбекистон футбол ассоциацияси матбуот хизмати хабар берди.
2007-йилда Одил миллий терма жамоа сафида дебют қилган. Ўшандан бери 108 та ўйин ўтказди ва 21 та гол уришга муваффақ бўлди. 4 та Жаҳон чемпионати саралашида қатнашди, 3 бор Осиё кубогида иштирок этди ва “Ўзбекистон Республикасида хизмат кўрсатган спортчи” фахрий унвони билан тақдирланди.
Одил Аҳмедов нафақат Ўзбекистоннинг, балки ўз вақтида Осиёнинг энг ёрқин футболчиларидан бирига айланди. Аҳмедов деганда ишонч, фидойилик, жонкуярлик тимсоллари кўз олдимизга келади.
