Республика таълим марказида Франция элчихонаси билан ҳамкорликда Ўзбекистонда француз тилини ўқитишни янги босқичга олиб чиқиш мақсадида учрашув ташкил этилди.
Учрашувда Республика таълим маркази мутахассислари, Франциядаги Ўзбекистон элчихонасининг минтақавий ҳамкорлик бўйича атташеси Серж Беллини, Филология ва маданиятларни ўқитиш бўйича Янги Сорбона университетининг фахрий профессори, тилларни чет тили сифатида ўқитиш бўйича халқаро эксперт Жан Клод Беакко иштирок этди, дея хабар бермоқда марказ.
Қайд этилишича, Ўзбекистонда 2019 йилда 1187 та мактабда француз тили ўқитилган. Бироқ бугунга келиб эса бу мактаблар сони сезиларли даражада қисқарган. Француз тилининг чет тили сифатидаги обрўсини тиклаш мақсадида ташкил этилган бу семинарда француз тилини чет тили сифатида ўқитиш учун ўқув дастури ишлаб чиқиш, Француз тили дарсликларини минтақамиз маданиятига мослаштирган ҳолда такомиллаштириш масаласи кўриб чиқилгаг.
Шунингдек, тилларни чет тили сифатида ўқитиш бўйича халқаро эксперт Жан Клод Беакко ўзбек тилини чет тили сифатида CEFR тизимида ўқитишни жорий қилиш учун амалга оширилаётган тадқиқот ва тажрибаларда ҳам ўзининг мутахассис сифатидаги ёрдамини аямаслигини билдирган.
Семинар давомида Франция вакиллари билан таълимдаги ислоҳотлар учун доимий ҳамкорликни йўлга қўйишга келишиб олинган.
