Хорижда вақтинчалик меҳнат фаолиятини амалга ошириш бўйича фуқароларимиздан келаётган аксарият саволларга Ташқи меҳнат миграцияси агентлиги Ахборот хизмати раҳбари Ортиқхўжа НОРОВдан жавоб олдик.
ҲОЗИРГИ ВАҚТДА КОРЕЯ РЕСПУБЛИКАСИГА ИШЧИ ВИЗАСИ БИЛАН КЕТИШ МУМКИНМИ?
— Маълумки, 2020 йилнинг март ойида бутун дунёда Covid-19 пандемияси бошланиши оқибатида жорий этилган қатор чекловлар сабабли ишчи кучи жўнатувчи барча давлатлар, шу жумладан Ўзбекистон фуқароларини Корея Республикасига ишга жўнатиш жараёни тўхтатилган эди. Корея Республикаси Бандлик ва меҳнат вазирлиги расмий баёнотига кўра, жорий йилнинг ноябрь ойи охирида ишчи кучи жўнатувчи барча давлатлар, шу жумладан Ўзбекистондан Е-9 ишчи визаси билан меҳнат мигрантларини қабул қилиш жараёни тикланиши режалаштирилган. Бунинг учун имтиҳон жараёнларининг барча босқичларидан ўтган, иш берувчи томонидан меҳнат шартномаси берилган ва Корея Республикасига ишлаш учун кетишини кутиб турган фуқаролардан:
- Корея Республикасида тан олинган, яъни Astrazeneca, Moderna, Pfizer вакциналардан бири билан Корея Республикасига кириб боришдан камида 14 кун олдин тўлиқ эмланган бўлиши ва тегишли сертификатни тақдим этиши;
- Корея Республикасига кириб боришида дастлаб бир ҳафта олдин ва учиш вақтидан олдин 72 соат ичида Корея Республикасининг Ўзбекистон Республикасидаги элчихонаси томонидан тан олинган, яъни Korea No 1 Laboratory, SWISS LAB, De Factum Laboratories, INTERMED Innovation лабораторияларидан бирида ПЦР тест топширган ва тест натижаси манфий бўлиши талаб этилади. Шунингдек, Корея Республикасига кириб борган меҳнат мигрантлари аввалгидек 14 кун эмас, балки 10 кунлик карантин даврини ўташи ҳам лозим бўлади. Маълумот ўрнида, Корея Республикаси Инсон ресурсларини ривожлантириш хизмати томонидан рухсат берилган дастлабки, яъни аввал Корея Республикасида ишлаб, шартнома билан қайтган 50 нафар юртдошимиз жорий йил 25 ноябрь куни жўнаб кетиши режалаштирилган.
БУГУНГИ КУНДА РОССИЯДА ИШЛАШ БЎЙИЧА ҚАНДАЙ ИМКОНИЯТЛАР МАВЖУД?
— Айни пайтда қурилиш соҳасида вақтинчалик меҳнат фаолиятини амалга ошириш учун 10 минг фуқарони Россия Федерациясига соддалаштирилган тартибда ишга жўнатиш бўйича пилот лойиҳаси амалга оширилмоқда. Демак, ушбу лойиҳа доирасида:
- ишга ташкилий тарзда юборилаётган фуқароларга Россияда ишлаш рухсатномаси, яъни патентни расмийлаштиришда талаб этиладиган ҳужжатлар, тиббий кўрик, бармоқ изларини олиш Россия иш берувчилари маблағлари ҳисобидан Ўзбекистонда амалга оширилади;
- ишга номзодларни тиббий кўрикдан ўтказиш ва бир компонентли “Sputnik Light” вакцинаси билан эмлаш тадбирлари ҳам россиялик мутахассислар томонидан Ўзбекистонда ўтказилмоқда;
Лойиҳа доирасида республикамизнинг барча ҳудудларида танловлар ўтказиш жорий йилнинг 15 октябридан бошланган. Иш берувчилар талабига кўра, Россияда ишлаш истагидаги 18 ёшдан 50 ёшгача бўлган Ўзбекистон фуқароси рус тилида мулоқот қила оладиган, қурилиш йўналишида касб-ҳунарга ва хорижга чиқиш паспортига эга бўлиши лозим. Шунингдек, талабгорлар илгари Россияда бўлган бўлса унга нисбатан қонунчилик талабларини бузганлиги учун тақиқ қўйилмаган ҳам бўлиши керак. Иш берувчилар томонидан таклиф этилаётган иш ҳақи миқдори ўртача 40-60 минг рублни ташкил этмоқда. Ушбу жараёнлар, яъни Ўзбекистонда фуқарони танлашдан бошлаб, Россияда патент асосида иш бошлашгача бўлган вақт кўпи билан Ўзбекистонда 18 кун, Россияда 7 кунда амалга оширилади. Таъкидлаш жоиз, авваллари Россияда патент ҳужжатларини расмийлаштиришнинг ўзига 25-30 кун вақт талаб этилган. Ушбу тадбирлар эса Россияда ишлаш истагида бўлган кўплаб юртдошларимиз учун қўшимча имкониятлар яратиб, фуқароларнинг вақти ва харажатларини қисқартиришга хизмат қилади.
Моҳинур РУСТАМОВА суҳбатлашди
