Олий Мажлис Қонунчилик палатасининг навбатдаги мажлиси бошланди. Депутатлар дастлаб “Тадбиркорлар кунини белгилаш тўғрисида”ги қонун лойиҳасини биринчи ўқишда кўриб чиқишди.
Депутатлар томонидан биринчи ўқишда кўриб чиқилган қонун лойиҳаси Ўзбекистон Республикаси Президенти Шавкат Мирзиёевнинг мамлакатимиз тадбиркорлари билан очиқ мулоқоти давомида берилган топшириқлар ҳамда 2021 йил 24 августдаги тегишли фармойиши ижросини таъминлаш мақсадида ишлаб чиқилган.
Таъкидланганидек, мазкур қонун лойиҳаси Янги Ўзбекистоннинг барпо этилишида тадбиркорликнинг ижтимоий, иқтисодий ва сиёсий аҳамиятини янада юксалтириш, жамиятимизда тадбиркорликни оммалаштириш ҳамда инсофли тадбиркорликни тизимли рағбатлантириш имконини беради.
Қонун лойиҳаси билан юртимизда 20 август — Тадбиркорлар куни сифатида белгиланмоқда.
Депутатлар айтишича, қонун лойиҳасининг қабул қилиниши тадбиркорларнинг мамлакатимиз тараққиётига қўшаётган ҳиссасига эътиборни қаратиш ва баҳолаш, катта ютуқларга эришган ва жамиятнинг ижтимоий муаммоларини ҳал этишда фаол иштирок этаётган тадбиркорларни аниқлаш ҳамда уларни тақдирлаш, аҳолини, айниқса, ёшларни тадбиркорликка кенг жалб қилишга хизмат қилади.
Мажлисда қонун лойиҳаси депутатлар томонидан қабул қилинди.
