Бугунги кунда Ўзбекистон Суперлигасида 14 та жамоа иштирок этиб келмоқда. Албатта, ҳар бир жамоанинг мақсади ва вазифалари турлича. Айримлари имкониятларидан келиб чиқиб ўз олдига мақсад қўяди. Бугун клубларимизнинг ҳомийлик ҳолатларига эътибор қаратамиз.
ҲОКИМЛИК ТАСАРРУФИДАГИ ЖАМОАЛАР
Тошкентнинг “Пахтакор”жамоаси яна муддатидан олдин Ўзбекистон чемпионатининг олтин медалларига эга чиқди. “Халқ” жамоаси номини олган “шерлар”га бугунги кунда Тошкент шаҳар ҳокимлиги эътибор қаратмоқда. Жаҳонгир Артиқхўжаев яқинда клубга барча шароитларни яратиб беришини маълум қилганди. Боз устига, шаҳар ҳокимининг ташаббуси билан “Пахтакор” мураббий ва футболчиларининг маошлари матбуотда очиқланди.
Наманганнинг “Навбаҳор”жамоаси ҳам вилоят ҳокимлиги ҳомийлигидаги жамоа ҳисобланади. Илгари Хайрулло Бозоровнинг шахсан ўзи “лочинлар”ни молиялаштириб келаётганди. Бозоров Фарғона вилояти ҳокимига айланган бўлса-да, ундан қолган эстафета таёқчасини Шавкат Абдураззоқов олди ҳамда унинг йўлини давом эттирмоқда. Наманган вилояти ҳокимлиги “Навбаҳор”нинг асосий ҳомийси ҳисобланади. Айтиш керакки, клубнинг йиллик бюджети катта.
НЕФТГАЗ ҚАРАМОҒИДАГИ ЖАМОАЛАР
UzTransGaz ташкилоти 9 йил давомида “Бунёдкор”нинг асосий ҳомийси бўлиб келган. 2020 йилдан бошлаб эса Uzbekneftegaz “қалдирғочлар”нинг ҳомийлигини ўз қўлига олди. Албатта, бу ташкилот клубни ҳомийлигига олганидан сўнг бюджет масаласида анча қисқартиришлар юзага келди. “Бунёдкор”да маркетинг яхши йўлга қўйилган бўлиб, давлат томонидан ажратилаётган маблағлардан ташқари, ўзини ўзи молиялаштиришга катта эътибор қаратади. Турли компанияларнинг рекламаси орқали жамоа молиявиий ҳолатини яхшиламоқда.
Худди шундай ҳолатни “Насаф” клубида ҳам кузатиш мумкин. Қарши клубини ҳам Uzbekneftegaz ҳомийлигига олган. Бироқ “Насаф”да вазият кутилганидек яхши эмас. Молиявий муаммолар ушбу клубни анчадан буён таъқиб қилиб келмоқда.
ОЛМАЛИҚ КОН МЕТАЛЛУРГИЯ КОМБИНАТИ ВА НАВОИЙ ОЛТИН ЗАВОДИ ҲОМИЙЛИГИДАГИ ЖАМОАЛАР
Бугунги кунда Олмалиқ кон Металлургия комбинати АГМК клубининг асосий ҳомийси ҳисобланади. Ушбу ташкилот анчадан буён жамоага эътибор қаратиб келади. Молиявий томонлама жуда бақувват бўлган АГМК клуби Суперлиганинг етакчи жамоаларидан бири ҳисобланади.
Навоийнинг Олтин заводи эса “Қизилқум”нинг ҳомийси бўлиб, неча йилдирки, ташкилот клубнинг молиявий ҳолатига жавобгар. Маълум бўлишича, “Қизилқум”нинг йиллик сметаси 30 миллиард сўмни ташкил қилади.
ТЕМИРЙЎЛЧИЛАР “ЛОКОМОТИВ”И ВА ЭЛЕКТР ЭНЕРГИЯ ТИЗИМИ ЖАВОБГАР БЎЛГАН “СЎҒДИЁНА”
Тошкентнинг “Локомотив” клубига Ўзбекистон темирйўллар ташкилоти ҳомий ҳисобланади. Бундан ташқари, Oriant Finance Bank ҳам “Локо”нинг ҳомий ташкилотидир.
Жиззахнинг “Сўғдиёна” клубига асосий ҳомий бўлган Ўзбекистоннинг энг йирик ташкилотларидан бири “Ўзбекэнерго” АЖ клуб тизимидаги бошқа жамоаларга ҳам ҳомийлик қилади.
ХУСУСИЙ КЛУБЛАР
Бугунги кунда “Андижон” ҳамда “Турон” жамоалари хусусий жамоалар ҳисобланади. Яқинда вилоятнинг катта тадбиркорларидан бири “Андижон”нинг раҳбарига айланди ва уни молиялаштириб келмоқда. Тадбиркор ўзининг шахсий маблағлари билан клубни тез орада етакчилар қаторига олиб чиқишни мақсад қилганини билдирди.
“Турон” эса қисқа вақт ичида Суперлига даражасига кўтарилган кам сонли жамоа ҳисобланади. Клуб тўлиқ хусусий бўлиб, бир нечта тадбиркорларнинг қўллаб-қувватлашлари билан ўзини молиялаштиради.
Иззат Абдуваҳобов
