АҚШ президенти Барак Обама Шимолий Кореяга қарши янги санкциялар жорий қилди. Бу ҳақда “Lenta.ru” хабар бермоқда.
Обама имзолаган қарор АҚШ ҳудудида КХДРга тегишли барча мулкларни блоклашни ва КХДРнинг исталган саноат соҳалари билан боғлиқ активларни музлатишни кўзда тутади.
АҚШ фуқароларига Пхеньяннинг манфаати бўлган исталган махсулот ва технологияларни экспорт қилиш, Шимолий Кореяга инвестиция киритиш, мамлакат ҳукуматига металл, графит, кўмир ва дастурий таъминот етказиб бериш тақиқланди.
Бундан ташқари, Вашингтоннинг фикрича инсон ҳуқуқларини бузаётган ва Пхеньян манфаати учун кибер жиноятга қўл ураётган фуқароларга ҳам санкциялар жорий қилинди.
“АҚШ ва бутун дунё ҳамжамияти Шимолий Кореянинг ноқонуний ядро қуроли ишлаб чиқишини қабул қила олмайди ва уларган қарши санкция қўллашда давом этади”,—деб қўшимча қилди Оқ уй вакили.
