Футзал бўйича Осиё чемпионати "А" гуруҳи сўнгги тури доирасида Ўзбекистон ва Ливан терма жамоалари ўртасида кечган учрашувдан сўнг Ўзбекистон терма жамоаси бош мураббийи Хосе Мария Мендез матбуот анжуманида иштирок этди, деб ёзади www.uff.uz нашри.
- Биз бугун қайсидир терма жамоа. Қирғизистон, Ливан ёки Саудия Арабистони эмас, балки фақат мухлислар учун ўйнадик. Назарий жиҳатдан олиб қараганда бугунги ўйин натижаси мутлақо аҳамиятсиз эди. Аммо биз фақат мухлислар учун ўйнадик. Шунингдек сариқ карточкаси бор бўлган Ирсалиевни кейинги ўйинда иштирок эта олмай қолмаслиги учун чора тадбирлар қўлладик. Яна 4 футзалчимиз кеча шамоллаб қолган эди. Улар бу ўйинга тайёр ҳолда келишди ва бундан беҳад мамнунман.
Бугунги ўйинни жуда яхши ўтказдик. Шу билан бирга Ливанга ҳам қойил қолиш керак. Рақиб иккинчи бўлимда ўйинини кучайтира олди. Бизнинг жисмоний тайёргарлигимиз яхши эмаслиги бу ўйинда кўриниб қолди. Мен яна Рустам Умаровнинг ўйинини алоҳида таъкидлаб ўтмоқчиман. У Осиёнинг энг яхши посбонларидан бири эканини исботлади. Бизни энди мусобақанинг энг муҳим ўйини кутиб турибди. Чорак финалда ғалаба қозонишимиз шарт.
- Сариқ карточкалари бор футзалчилар бор, шунингдек 4 футболчининг мазаси бўлмай қолганини айтдингиз. Шунга қарамай бугун яхши ўйин намойиш этишнинг уддасидан чиқдингиз. Демак жамоангизда тенг кучли таркиб борми?
- Мен олдин ҳам айтганман, бизда суперюлдузлар йўқ. Таркибимиз тенг кучли футболчилардан иборат. Албатта Япония сингари тенг кучга эга икки таркибимиз борлигини айта олмайман, аммо бир икки футзалчимиз бор, улар жамоа ўйинини ушлаб тура олади. Биз ҳар сафар янгича ўйин намойиш қилишимиз мумкин.
- Жамоангиз бир кун дам олиши мумкин. Бу кундан қандай фойдаланмоқчисиз?
- Биз аввало касал бўлиб қолган футзалчиларни оёққа тургазишга ҳаракат қилишимиз керак. Улар сафга қайтса, муаммоларимиз камаяди. Шунингдек тумов касаллиги жамоадаги бошқа ўйинчиларга ўтиб кетмаслиги учун эхтиёт чораларини кўришимиз керак.
- Эрон ва Ироқ ўртасида кечган учрашувда ироқликлар йўл қўйган хатоларни ўрганиб чиқасизми?
- Ироқ терма жамоаси бугун Эронга қарши ўтказган ўйинига у қадар эътибор қаратмаган бўлардим. Чунки бу ўйин бизга кўп нарса бермаслиги аниқ. Аслида ҳар қандай жамоанинг Эронга қарши ўтказадиган ўйини ҳеч қандай аҳамият касб этмаслиги аниқ. Чунки Эрон мутлақо бошқача савияга эга жамоа. Бу жамоа бошқа даражада ўйнайди.
- Сиз жамоамизда суперюлдузлар йўқлиги ҳақида гапирдингиз. Лекин Рустам Умаров балки ўсиб келаётган янги юлдуздир...
- Мен юлдуз йўқ деганда шуни назарда тутдимки. биз алоҳида бир ўйинда кимгадир қарам бўлиб қолмаймиз. Бир ўйинда Юнусов. бошқасида Умаров етакчи бўлиши мумкин. Биз жамоавий ўйин намойиш қиламиз. Аслида футзалчиларимиз қайд этган статистикага қарасак ҳам бунга ишонч ҳосил қиласиз. Яна шуни ҳам айтишим лозимки, бугун Жамол шамоллаб қолган бўлсада яхши ўйин намойиш қилди. Балки ундаги тумовни кимгадир ўтказсак, келаси ўйинда у ҳам яхши ўйнаб юборар.
