Ob-havoning keskin sovub ketishi natijasida gaz hamda elektr isitish moslamalaridan foydalanishga bo`lgan extiyoj ortib boradi. Bunday paytlarda ayrim fuqarolarning extiyotsizligi oqibatida ko`ngilsiz xodisalar sodir bo`lishi mumkin.
Toshkent shahar Yong`in xavfsizligi boshqarmasi, mazkur xodisalarni oldini olish maqsadida gaz va elektr uskunalaridan hamda isitish moslamalaridan foydalanishda quyidagi yong`in xavfsizligi talablariga rioya qilishini so`radi:
- qo`lbola va nosoz gaz hamda elektr isitish moslamalaridan foydalanmang;
- tungi vaqt aholi turar joylarida o`rnatilgan isitish tizimini nazoratdan qoldirmang;
- oshxonada o`rnatilgan tabiiy gazda ishlovchi plitalardan xonalarni isitish maqsadida foydalanmang;
- isitish pechlari va ularning mo`rilarini sozligiga, turli buyum va to`siqlar bilan berkitilmasligiga hamda maxsus tashkilotlar tomonidan o`z vaqtida tozalanishiga alohida e`tibor bering;
- isitish moslamalaridan foydalanishda ularni ishlab chiqargan korxonaning tavsiya va yo`riqnomasi talablariga rioya qiling;
- isitish moslamalari yaqinida yonuvchan buyum va oson alangalanuvchi maxsulotlarni saqlamang;
- gaz uskunalarni ulash tartib qoidalariga rioya qiling va ularga rezina shlangalar orqali ulanishga yo`l qo`ymang;
- agarda gaz xidini sezsangiz, chiroq va uchqun chiqaruvchi moslamalardan aslo foydalanmang, darxol xonani shamollating xamda gaz xizmatiga xabar bering.
Yong`in xavfsizligi qoidalarga rioya etish bilan Siz o`zingiz va yaqinlaringizni yong`indan asrab qolgan bo`lasiz.
