Bugun Toshkent davlat yuridik universitetining Ixtisoslashtirilgan filialida ushbu ta`lim muassasasi bilan O`zbekiston Respublikasi Ichki ishlar vazirligi Malaka oshirish instituti o`rtasida o`zaro hamkorlik to`g`risida memorandum imzolandi.
Memorandumga ko`ra, huquqbuzarliklar profilaktikasi va jamoat xavfsizligini ta`minlash sohasida kadrlarni tayyorlash va qayta tayyorlashning o`quv rejalari va dasturlarini ishlab chiqishda, ta`lim jarayoniga zamonaviy axborot-kommunikasiya texnologiyalarini tatbiq etish, innovasion va texnologik g`oyalarni rivojlantirish, qonunchilik va huquqni qo`llash amaliyotini takomillashtirishga doir ilmiy asoslangan xulosa va tavsiyalar ishlab chiqish bo`yicha yaqindan hamkorlik qilish belgilandi.
– Shiddat bilan rivojlanib borayotgan hozirgi davr talablari barcha sohalarda, shu jumladan kadrlarni tayyorlash, qayta tayyorlash va malakasini oshirishni amalga oshiruvchi ta`lim va ilmiy-tadqiqot muassasalari bilan o`zaro samarali hamkorlikni chuqurlashtirishni talab etmoqda. – deydi IIV Malaka oshirish instituti boshlig`i, yuridik fanlari doktori, professor Nuriddin Normatov.
– Toshkent shahri va Toshkent viloyatida huquqbuzarliklar profilaktikasi va jamoat xavfsizligini ta`minlash sohasida kadrlar tayyorlash va qayta tayyorlash samaradorligini yanada oshirish maqsadida tashkil etilgan ushbu ta`lim muassasasi bilan o`rnatilayotgan hamkorlik yo`nalishlari keng qirralidir.
Jumladan, nazariy tayyorgarlikning huquqni qo`llash faoliyati bilan uzviy bog`liqligini ta`minlashga qaratilgan zamonaviy shakl va usullardan foydalanish, axborot-kommunikasiya texnologiyalarini qo`llagan holda o`quv jarayonini samarali tashkil etish, huquqbuzarliklar profilaktikasi va jamoat xavfsizligini ta`minlash bo`yicha faoliyatga uslubiy ko`maklashish kabi yo`nalishlarda hamkorlik amalga oshiriladi.
– IIV Malaka oshirish instituti bilan hamkorlik biz uchun dolzarb ahamiyatga ega, – deydi Toshkent davlat yuridik universitetining Ixtisoslashtirilgan filiali direktori, yuridik fanlar nomzodi Baxtiyor Abdullaev. – O`zaro hamkorlik memorandumiga asosan, o`qitishning zamonaviy innovasion shakl va usullari, o`quv jarayonini samarali tashkil etish bo`yicha o`zaro tajriba almashish, o`quv jarayoniga malakali mutaxassislarni jalb qilish, normativ-huquqiy, metodik va tahliliy xususiyatga ega bo`lgan ma`lumotlarni almashish, professor-o`qituvchilarning malakasini oshirish, o`quv, ilmiy va boshqa adabiyotlarni almashish, qonunchilikni takomillashtirish va yagona huquqni qo`llash amaliyotini ta`minlash bo`yicha hamkorlikda ilmiy asoslangan xulosa va tavsiyalar ishlab chiqish kabilar amalga oshiriladi.
Mazkur ta`lim muassasalarining o`zaro hamkorligi mamlakatimizda huquqbuzarliklar profilaktikasi va jamoat xavfsizligini ta`minlash sohasida kadrlar tayyorlash, qayta tayyorlash va ularning malakasini oshirish samaradorligini yanada oshirishga, ularning zamonaviy talablar asosida kasbiy ko`nikmalari va layoqatlarini rivojlantirib borishga ijobiy ta`sir ko`rsatadi.
Ta`lim muassasalari rahbarlari kelgusida memorandumda belgilangan vazifalar ijrosini ta`minlash bo`yicha “Yo`l xaritasi”ni ishlab chiqishga kelishib oldilar.
IIV Malaka oshirish instituti Matbuot xizmati
