Bojxona organlari tomonidan rangli metallarning noqonuniy aylanmasiga qarshi samarali kurash olib borilmoqda.
Jumladan, Navoiy viloyati bojxona boshqarmasi tomonidan o`tkazilgan navbatdagi tezkor tadbir davomida kuzatuvga olingan fuqaro B.B. boshqaruvidagi “Isuzu” rusumli avtotransport vositasi to`xtatilib, belgilangan tartibda nazoratdan o`tkazildi. Bu haqda Davlat bojxona qo`mitasi axborot xizmati xabar bermoqda
Natijada, avtomashina yukxonasidagi paxta yog`lari orasiga qiymati 18,1 million so`mlik 1003 kilogramm rangli metall parchalari yashirilganligi aniqlandi.
Shuningdek, yana bir holatda fuqaro X.N. boshqaruvidagi yana bir “Isuzu” rusumli yuk avtomashinasi to`xtatilib, belgilangan tartibda nazoratdan o`tkazildi.
Tekshiruv jarayonida avtomashina yukxonasida tegishli hujjatlari bo`lmagan, don mahsulotlari orasiga yashirilgan umumiy qiymati 57,3 million so`mlik 3160 kilogramm og`irlikdagi rangli metallar borligi aniqlandi.
Hozirda mazkur holatlar yuzasidan bojxona organlari tomonidan surishtiruv harakatlari olib borilmoqda.
