Bu erda Raqamli texnologiyalar markazi ham ochiladi, deb xabar berdi AKT matbuot xizmati.
Shu yilning 19 mart kuni O`zbekiston Respublikasi Prezidenti Shavkat Mirziyoev raisligida o`tkazilgan videoselektor yig`ilishida davlatimiz rahbari tomonidan ilgari surilgan ijtimoiy, ma`naviy-ma`rifiy sohalardagi ishlarni yangi tizim asosida yo`lga qo`yish bo`yicha 5 ta muhim tashabbusni mamlakatimizning barcha hududlarida keng joriy qilish masalalari muhokama qilingandi.
Ushbu tashabbuslardan birining ijrosi Axborot texnologiyalari va kommunikasiyalarini rivojlantirish vazirligi zimmasiga yuklanib, unga ko`ra, ilg`or xalqaro tajribalar asosida barcha shahar va tumanlar markazlarida Raqamli texnologiyalar o`quv markazlarini tashkil etish topshirig`i berilgandi.
Mazkur topshiriqlarni bajarish bo`yicha Namangan va Sirdaryoda «Raqamli texnologiyalar markazi» tashkil etildi. Bu kabi markazlarni 2020 yilga qadar bosqichma-bosqich respublikamizning barcha tuman va shaharlarida ochish belgilangan.
O`sha kungi yig`ilishda davlatimiz rahbari aholi, ayniqsa, yoshlar ma`naviyatini yuksaltirish masalasiga to`xtalib, «Har bir rahbar o`zining shaxsiy kutubxonasidan o`zi ta`lim olgan maktab kutubxonasiga kitoblar sovg`a qilsa, bu yaxshi tashabbus bo`lib kitobxonlikni rivojlantirish bilan farzandlarimiz tarbiyasiga ijobiy ta`sir ko`rsatadi», deb ta`kidlagandi.
Mazkur tashabbus asosida shu kunlarda turli soha rahbarlari tomonidan maktablarga kitoblar hadya qilinmoqda.
Axborot texnologiyalari va kommunikasiyalarini rivojlantirish vaziri Shuhrat Sodiqov ham Toshkent viloyati, O`rtachirchiq tumanidagi o`zi tahsil olgan 3-o`rta maktabga bordi. Vazir ushbu maktabga o`z shaxsiy kutubxonasidan kitoblar tuhfa qildi.
Shuningdek, vazir maktabning informatika sinfini mukammal ta`mirlash va uni kompyuterlar bilan jihozlash tashabbusini ilgari surdi. Qolaversa, shu erning o`zida yoshlarni bo`sh vaqtlarini samarali tashkil etish va dasturlash saboqlarini o`rgatish uchun Raqamli texnologiyalar markazi faoliyatini yo`lga qo`yish belgilab olindi.
Ayni vaqtda kompyuterlar to`plami maktabga etkazilgan. Ta`lim dargohiga optik tolali aloqa liniyasi tortilib, kompyuter sinflari yuqori tezlikdagi internet tarmog`iga ulanishi ta`minlanadi.
