Rishton azaldan hunarmandlar maskani bo`lgan. Rishton kulollari tayyorlagan ko`za va xumlarda jaziramada suv saqlangan, suv o`n kungacha holatini o`zgartirmagan.
Rishtonlik usta kulol Alisher Nazirov tayyorlagan kulolchilik buyumlarida birorta ortiqcha detal ishlatilmaydi. Ulardagi bo`yoqlar xuddi qadimda qilinganidek, tog` o`simliklari qaynatmasidan olinadi. Bu esa buyum rangi o`chmay jilosini yo`qotmasligini ta`minlaydi.
Alisher Nazirov ko`za yoki boshqa buyum yasayotganda loyga yuragining bir bo`lagini ham qo`shib qoradi. Ustaning uy-muzeyi va ustaxonasi bor.
– Kulolchilik san`ati qadimiy hunarlardan, - deydi Alisher aka. – Biz tayyorlagan mahsulotlar sifati bilan ajralib turadi. Chunki qizil, oq rangdagi idish-tovoqlarga qo`rg`oshin, qizil kesak bilan sirlanib ohor beriladi. Kulolchilik bilan oilaviy shug`ullanamiz.
Shuningdek, 20 nafar shogirdim bilan tayyorlagan suvenir va sopol idishlar Evropa muzeylarida saqlanmoqda, deb yozmoqda O`zA.
