Rossiya teleseriallari yulduzi, kinoaktyor Mixail Porechenkov IV PROlogue xalqaro kinofestivalining faxriy mehmonlari ro`yxatidan joy oldi.
Kinofestival direksiyasidan ma`lum qilinishicha, Mixail Porechenkov boshqa kinoyulduzlar qatorida tadbirning tantanali yopilish marosimida qatnashadi.
Rossiyalik teatr va kino aktyori, kinorejissyor, ssenarist, prodyuser, teleboshlovchi Mixail Porechenkov 1969 yil 2 martda Sankt-Peterburgda tug`ilgan. Aktyor «Agent nasionalnoy bezopasnosti» serialidagi bosh roli – Aleksey Nikolaev orqali mashhurlikka erishgan. O`zbek tomoshabinlariga u Fyodor Bondarchukning O`zbekistonda suratga olingan «9 rota» filmidagi keksa praporshik Digalo qahramoni orqali yaxshi tanish. 2006 yilda Rossiya Federasiyasida xizmat ko`rsatgan artist unvonini olgan.
PROlogue xalqaro kinofestivali 27 – 30 noyabr kunlari Toshkentda bo`lib o`tadi. Tashkilotchilarning so`zlariga ko`ra, to`liq va qisqa metrajli badiiy filmlar hamda milliy qisqa metrajli badiiy filmlar xalqaro tanlovida ishtirok etish uchun 280 dan ortiq ish kelib tushgan. Qozog`iston, Isroil, Eron, Ukraina, AQSh, Peru singari 60 dan ortiq davlatlarning kino olami vakillari PROlogue kinofestivalida qatnashish istagini bildirgan.
