Davlatimiz rahbari Shavkat Mirziyoevning 2017 yil 25 yanvardagi qaroriga muvofiq, Asaka shahridagi avtomobil zavodiga Birinchi Prezidentimiz nomi berilgan edi. Kecha “GM-Uzbekistan” AJda Islom Karimov siymosi aks ettirilgan memorial majmua ochildi. Shu munosabat bilan o`tkazilgan tantanali tadbirda davlat va jamoat tashkilotlari vakillari, avtomobilsozlar hamda mamlakatimizning turli hududlaridan tashrif buyurgan mehmonlar qatnashdi.
Marosimda so`zga chiqqanlar mustaqilligimiz asoschisining bugungi tinch va farovon hayotimizni ta`minlash yo`lidagi buyuk xizmatlarini e`tirof etishdi. Jumladan, “GM-Uzbekistan” AJ bosh direktori vazifasini bajaruvchi Rustam Rajabovning ta`kidlashicha, mazkur zavod milliy iqtisodiyotimiz rivojiga ulkan hissa qo`shdi. Xususan, dastlabki yilda bu erda uch turdagi avtomobillar tayyorlangan bo`lsa, hozirgi paytga kelib ular soni 11 taga etdi. Ayni paytda korxona to`liq quvvat bilan ishlab, yiliga 200 ming dona mashinani buyurtmachilarga etkazib bermoqda. Uning konveyerlaridan shu kungacha 2,7 million donadan ziyod avtomobillar chiqdi. Bugungi kunda o`zbek mashinalari dunyoning o`nlab mamlakatlariga eksport qilinmoqda. Qolaversa, bu erda yangi-yangi modellarni yaratish ustida izchil izlanishlar olib borilayapti.
— Birinchi Prezidentimiz bilan bir necha marotaba muloqot qilish baxtiga muyassar bo`lganman, — deb xotirlaydi O`zbekiston Qahramoni, ishlab chiqarish texnologiyalari bo`limi bosh texnologi Hasanboy Qosimov. — Faoliyatimni 1985 yilda telejka zavodida boshlaganman. Uning bazasida qo`shma korxona barpo etilishi ko`plab mahalliy ishchi-mutaxassislar hayotida tub burilish yasadi. Birinchi Prezidentimiz bu erga tez-tez tashrif buyurib, korxonamiz qurilishining borishi bilan tanishar edi. 1996 yil 19 iyul sanasi esa mustaqil davlatimiz tarixi solnomalariga oltin harflar bilan bitildi. Shu kuni zavodimiz tantali ochildi.
