— 19 yoshdaman. Oilada uch nafar qiz voyaga etdik. Opam turmushga chiqib, baxtli yashamoqda. Bir yil avval meni mahallamizdagi bir yigitga fotiha qilib qo`yishgandi. Bahorda to`yimizni o`tkazish rejalashtirilgan. Yaqinda telefon orqali gaplashib bir yigit bilan tanishdim. Unga ko`ngil qo`ydim. Onamga aytib, fotihani buzishlarini va o`zim yoqtirgan yigitga turmushga chiqarishlarini so`ramoqchiman. Siz nima deysiz?..
Irodaxon, Marg`ilon shahri
Muhiba HAMIDOVA, filologiya fanlari nomzodi, jurnalist: — Asal qizim, ko`ngilning ayri ko`chalari qursin-a. Unashtirilgan qiz nima qilib boshqa bir yigit bilan telefonlashib, boshingizga muammo orttirib yuribsiz. Uyat, sharmandalik, ona qizim! Bu gapni bizga maslahat solib, ko`nglingiz, vijdoningiz qiynalganiga malham istabsiz, rahmat. (O`z bilganidan qolmaydigan qizlarimiz ham bor-da.) Endi bizga quloq ossangiz, qizim, bu hoyu havasdan voz keching. Telefondagi yolg`onchi xushomadlarga uchmang. Ota-onangizning yuzini erga qaratmang. Ular mahallada qanday bosh ko`tarib yurishadi? O`zingiz-chi? Beburd qiz degan yomon nom orttirib isnodga qolmaysizmi? U bo`lg`uvsi kuyov bola — sizga umrlik yo`ldosh bo`lish, sizni baxtli ayol qilish orzusida yurgan begunoh yigit bechoraning aybi nimada?
Keling, sizning ko`nglingizga qaytadigan bo`lsak, agar turmushga chiqadigan mahalladosh yigitga ko`nglingiz “jizz” etmaganida, avvalo, to`yga rozilik bermasdingiz, to`g`rimi? Qolaversa, “unashtirilganmiz” deb bir yildan beri nari-beri gaplashib yurgandirsizlar. Bu va`dalar qani? Qolaversa, qaynonangiz kelin liboslarni sizning bo`y-bastingizga mos qilib, yaxshi niyatlar bilan xarid qilib qo`ygan. Ezgu niyatlarga hamroh bo`ling, qizim.
Sizdagi qiz bola oriyati mustahkam, ismingizga munosib irodali, bir so`zli inson ekaningizga hammani ishontiring. Avval baxt — naqd baxt, qizim. Orqaga chekinish, fikrni o`zgartirish yaxshilikka olib kelmaydi. Telefondagi oshiq qizlar bilan telefonlashib, baxtini topib olar. Unga ham iymon-insof tilab qolamiz.
Manba: «SUG‘DIYONA» gazetasi.
