— Gormonal preparatlarning nojo`ya ta`siri haqida turli gaplar eshitib, xavotirlanib qoldim. Chunki o`zim ham gormonal dorilar ichaman. Ularning salbiy ta`siri qanday va qay holatda yuzaga kelishi mumkin?
Sadoqat Omonova, Oqqo`rg`on tumani
Nodira HAYDAROVA, shifokor-terapevt: — Gormonal preparatlar bemorning umumiy ahvoli va aniqlangan kasallik turiga ko`ra belgilanadi. Gormonal terapiya faqat shifokor nazorati bilan amalga oshirilishi lozim. Gormonlar miqdorini nazorat qilish uchun har ikki oyda bir marta shifokor ko`rigi belgilanadi. Bunda muolaja davomida organizmdagi gormonlar darajasi aniqlanib, keyingi turi belgilanadi. Gormonal preparatlar qabulini birdaniga to`xtatib bo`lmaydi. Bu jarayon sekin-astalik bilan amalga oshiriladi. Organizm kunlik qabul qiladigan moddalar hisobiga ham kerakli gormonlar miqdorini to`ldirib boradi. Shu bois gormonlarni o`zingizcha aniqlamang. Bilib-bilmay gormonal preparatlarni qabul qilish esa quyidagi asoratlarga olib kelishi mumkin:
- oshqozonda yara hosil bo`lishi;
- erkaklarda ginekomostiya (ko`krakning kattalashuvi);
- ayollarda semirish, tanadagi tuklarning ortishi;
- Kushengoid (yuz tuzilishining oysimon shakli).
Manba: "SUG‘DIYONA" gazetasi.
