Fors ko‘rfazi mintaqasidagi arab davlatlari — Saudiya Arabistoni va Birlashgan Arab Amirliklari AQSh prezidenti Donald Trumpning Eron bilan urushni diplomatik yo‘l bilan yakunlash niyatidan havotirda. Bu haqda "The Wall Street Journal" nashri manbalariga tayanib xabar berdi.
Manbalarga ko‘ra, mazkur davlatlar Trumpni Eron mintaqada havf tug‘dirmaydigan darajada zaiflashguncha harbiy harakatlarni davom ettirishga ko‘ndirishga urinmoqda. Ular ehtimoliy kelishuv Tehronning ta’sirini saqlab qolishi va Fors ko‘rfazidagi xavfsizlikka tahdid solishidan qo‘rqmoqda.
Shu bilan birga, Turkiya aksincha, urushni tezroq tugatish tarafdori bo‘lib, diplomatik muzokaralarni faollashtirishga harakat qilmoqda.
Ayni paytda, AQSh va Eron o‘rtasidagi muzokaralar murakkab kechmoqda. Tomonlar bir-biriga nisbatan keskin talablarni ilgari surgan. Xususan, Vashington Erondan yadro dasturini to‘liq cheklashni talab qilmoqda, Tehron esa sanktsiyalarni bekor qilish va xavfsizlik kafolatlarini so‘ramoqda.
Mutaxassislar fikricha, ushbu qarama-qarshiliklar yaqin vaqt ichida kelishuvga erishishni qiyinlashtirmoqda.
