Yaponiya Tashqi ishlar vaziri Takeshi Ivaya ning Oʻzbekistonga tashrifi davomida ikki tomonlama aloqalarni harbiy va xavfsizlik yoʻnalishida chuqurlashtirish ehtimoli muhokama qilindi. Tashrif doirasida vazir Baxtiyor Saidov bilan 16 banddan iborat qoʻshma bayonot imzolandi va tomonlar strategik darajadagi muloqotni yoʻlga qoʻygani eʼtirof etildi.
Yaponiya TIV matbuot kotibi Kitamura Toshihiroga koʻra, Tokio Oʻzbekiston bilan mudofaa sohasida qanday hamkorlik qilish mumkinligini oʻrganmoqda. Harbiy mashgʻulotlar hozircha Oʻzbekistonning geografik holati sababli qiyin boʻlsa-da, boshqa yoʻnalishlarda muzokaralar olib borilishi rejalashtirilgan.
“Har qanday harbiy hamkorlik muntazam muhokama va aniqlikni talab qiladi. Oʻzbekiston bilan ham bu borada hamkorlik boʻlishi uchun avvalo aniq maqsadlarni bilishimiz kerak”, — deydi Kitamura.
Qoʻshma bayonotda terrorizm, ekstremizm, narkotik savdosi va xalqaro tahdidlarga qarshi kurashda ikki davlat birgalikda harakat qilishga kelishib olgani qayd etilgan.
