AQSh prezidenti Donald Trump Ukraina prezidenti Vladimir Zelenskiyni Qrimdan voz kechish va NATOga aʼzo boʻlmaslik shartlari evaziga urushni yakunlashga chaqirdi. Bu haqda u oʻzining Truth Social sahifasida yozib qoldirdi.
Trumpning taʼkidlashicha, "Obama Qrimni bir ogʻiz oʻqsiz bergan", va bu hududni qaytarib boʻlmaydi. NATOga aʼzolik esa "hech qachon amalga oshmaydi".
Shu munosabat bilan 18 avgust kuni Trump va Zelenskiyning Oq uydagi uchrashuvi Toshkent vaqti bilan soat 22:15 da boshlanadi.
Zelenskiy esa muzokaralar oldidan oʻz Telegram kanali orqali javob qaytarib, Ukraina hech qanday hududiy yoʻqotishga rozi boʻlmasligini taʼkidladi.
“Bu urush tinch va adolatli tugashi kerak. Qrim va Donbassni berish — yangi urushlar uchun tramplinga aylanadi. Bu 1994 yildagi xavfsizlik kafolati kabi puch gap boʻlmasligi shart”, — dedi Ukraina rahbari.
Uning soʻzlariga koʻra, Ukraina armiyasi Donetsk va Sumiy yoʻnalishlarida harakatni davom ettirmoqda, va “boshlagan urushni aynan Rossiya toʻxtatishi shart”.
