AQSH hukumati USAID (Xalqaro taraqqiyot agentligi) tomonidan Jo Bayden ma’muriyati davrida xarid qilingan 10 million dollarga teng ayollar kontratseptivlarini yoqib yuborishga qaror qildi. Bu haqda kecha, 28 iyul kuni AFP agentligi xabar berdi.
Gap homiladorlikning oldini oluvchi vositalar — bachadon ichki spirallari, implantatlar va dori tabletkalari haqida bormoqda. Ushbu vositalar dastlab kambag‘al davlatlarga yordam sifatida mo‘ljallangan edi, biroq USAID dasturlari yopilgach, kontratseptivlar Belgiyada omborlarda qolib ketdi.
Endilikda bu kontratseptivlar Fransiyadagi chiqindilarni yoqish zavodiga yuborilishi rejalashtirilgan. Ularni yo‘q qilish jarayoni o‘ziga xos xarajatlarni ham talab qilmoqda — faqatgina utilizatsiya uchun 167 ming dollar sarflanishi ko‘zda tutilgan.
So‘nggi kunlarda bir nechta xalqaro nohukumat tashkilotlar AQSH hukumatidan bu kontratseptivlarni qashshoq mamlakatlarga topshirishni so‘ragan.
Biroq Vashington bu taklifni rad etgan. Belgiyaning Tashqi ishlar vazirligi esa AQSH elchixonasi bilan muzokaralar olib borayotganini va ularni fikridan qaytarishga urinishayotganini bildirdi.
