Rossiya Federatsiyasi Federal Kengashi raisi Valentina Matviyenko, G‘arb sanksiyalariga qaramay, Jenevada bo‘lib o‘tgan ayol spikerlar xalqaro sammitida ishtirok etdi. U forum minbaridan chiqish qilib, Ukraina rasmiylarini Donbassdagi tinch hududlarga hujum uyushtirganlikda aybladi.
Matviyenkoning so‘zlariga ko‘ra, Moskva “qon to‘kilishini to‘xtatish” maqsadida mojaro hududiga aralashishga majbur bo‘lgan. U G‘arb davlatlarini “axborot urushi” olib borayotganlikda va “antirussiya ritorikasi”ni kuchaytirayotganlikda ayblab, sanksiyalarni bekor qilishga chaqirdi. Shuningdek, xorijiy yetakchilarni Donbassga tashrif buyurishga taklif qildi.
TASS agentligining yozishicha, Matviyenko boshchiligidagi Rossiya delegatsiyasi tarkibiga senatorlar Konstantin Kosachyov, Liliya Gumerova, Andrey Denisov hamda Davlat Dumasi deputatlari Pyotr Tolstoy va Leonid Slutskiy kirgan.
Shveytsariya OAVlariga ko‘ra, sanksiyalar ro‘yxatida bo‘lgan delegatlar uchun alohida ruxsatnomalar berilgan. Eslatib o‘tamiz, bu shaxslar Shveytsariya va Yevropa Ittifoqining sanksiyalar ro‘yxatida qolmoqda.
