Tojikiston va Qozog‘istonda hayvonlarning kuydirgi bilan kasallanish holatlari ko‘paygan. Kasallik O‘zbekistonga kirib kelishining oldini olish uchun chegaralarda tekshiruv o‘tkaziladi. Bu haqda Sanitariya-epidemiologik osoyishtalik va jamoat salomatligi qo‘mitasi bo‘lim boshlig‘i Farhod Qurbonbekov ma’lum qildi.
Farhod Qurbonbekovning aytishicha, respublikada kasallikning oldini olish uchun gumon qilingan holatlar yuzaga kelganda tashxislash, davolash uchun barcha sharoitlar yaratilgan. Bundan tashqari, kasallik o‘choqlarida tuproqdan namunalar olib, laboratoriya sharoitida doimiy nazorat joriy etiladi.
“Kasallik mamlakat hududiga kirib kelishining oldini olish maqsadida 55 ta chegara punktidan o‘tuvchilar chuqur tekshiruvdan o‘tkaziladi. Punktlarda infeksiya tarqalishining oldini olish uchun o‘tkazilishi zarur bo‘lgan chora-tadbirlar ishlab chiqilgan”, degan mutaxassis.
Kuydirgi (Sibir yarasi) – Bacillus anthracis bakteriyasi sababli yuzaga keladi. Xavfli infeksiya asosan hayvonlardan yuqadi va o‘ta yuqumli kasalliklar guruhiga kiradi.
Organizm infeksiya bilan zaharlangach, bezgak tutadi, teri, o‘pka va ichaklar zararlanadi. Kuydirgi bilan barcha turdagi hayvonlar hamda odamlar kasallanishi mumkin. Odamlarga kasallik ko‘proq kuydirgi kasalligiga chalingan hayvonlardan yuqadi. Kasal hayvonni parvarishlash, so‘yish, yaxshi termik ishlov bermasdan iste’mol qilish infeksiya yuqishiga olib keladi.
Kuydirgi kasalligi aksariyat hollarda teri shaklida uchraydi. Bunda bemor tibbiy muolajalar olib, asoratsiz sog‘ayadi. Kasallikning septik, ichak va o‘pka shakllari ham mavjud bo‘lib, juda og‘ir kechadi va odatda o‘lim bilan tugaydi.
