O‘zbekistonda banklarga kredit berishda avtosalon chegirmalarini hisobga olishga ruxsat berilishi mumkin. Bu haqda Shavkat Mirziyoyev raisligida bo‘lib o‘tgan yig‘ilishda ma’lum bo‘ldi.
Qayd etilishicha, ko‘plab avtosalonlar avtomobil xaridi uchun pul to‘liq to‘lansa chegirma bermoqda. Lekin amaldagi qoidalarga ko‘ra, kreditga beriladigan avtomashina uchun bu chegirmani banklar qabul qilmaydi. Vaholanki, banklarga chegirma qabul qilishga ruxsat berilsa, kredit stavkasi 4 foizga arzonlashadi.
Masalan, mashina 100 million so‘m turadi. Agar xaridor birdaniga to‘liq summani to‘lasa, avtosalon 10 million so‘m chegirma berishi mumkin, avtomobilning narxi esa 90 million so‘mni tashkil qiladi. Ammo xaridor avtokredit oladigan bo‘lsa, bank bu chegirmani qabul qilmaydi va kredit to‘liq qiymati – 100 million so‘mdan kelib chiqib hisoblanadi.
Bu cheklovni mahalliy avtomashinalar uchun bekor qilish muhimligi ta’kidlandi.
