Ijtimoiy tarmoqlarda Qarshi shahridagi 23-umumiy o‘rta ta’lim maktabi direktorining o‘quvchilar formasi uchun o‘qituvchilarga pul yig‘ish haqida topshiriq bergani ko‘ringan video tarqalgan edi.
Qayd etilishicha, Maktabgacha va maktab ta’limi boshqarmasi mas’ulning jarimaga tortilganini ochiqlagandi. Maktab direktori jamoatchilikka videochiqish qilib, yaxshi niyati noto‘g‘ri talqin qilinganini aytdi va xatosi uchun uzr so‘radi. Bu haqda "Millar" dasturida xabar qilindi.
Maktabimiz shahar markazida joylashgani uchun o‘quvchilarimiz ko‘p. Shuningdek, tan olish kerak, aksariyat o‘quvchilarimiz qimmatbaho avtomobil va qimmatbaho kiyimlarda darsga kelsa, boshqalari imkoniyati sabab bunday qilolmaydi. Men o‘quvchilar o‘rtasida tabaqalanish bo‘lmasligi uchun maktab formasini joriy etish bo‘yicha taklifimni bergandim. Agar bu holatda noto‘g‘ri gapirgan bo‘lsam, uzr so‘rayman. Maqsadim o‘quvchilar o‘rtasidagi tabaqalanishning oldini olish bo‘lgan, xolos, deydi direktor.
Viloyat maktabgacha va maktab ta’limi boshqarmasining aniqlashtirishicha, maktab direktori Feruza Shuhratova haqiqatan ham maktab o‘qituvchilariga 2025 yilning 21 yanvar kuni maktabning Telegram guruhida videomurojaat qilib, barcha o‘quvchilarga “jaket” olish haqida ko‘rsatma bergan. Direktor videoda formasi yo‘q o‘quvchini maktab darvozasidan chiqarib yuborishini aytgan.
Qayd etilishicha, ushbu maktab direktoriga nisbatan boshqarma boshlig‘ining 22 yanvardagi buyrug‘iga asosan o‘rtacha oylik ish haqining 25 foizi miqdorida jarima intizomiy jazo chorasi qo‘llangan. Boshqarma ta’lim tashkilotida majburiy tartibda o‘quvchilarni forma kiyishiga doir pul mablag‘larini yig‘ish, tashkil etish, qat’iyan taqiqlanganini bildirib, bu kabi salbiy holatlarni keskin qoralagan.
