30-noyabr kuni Dubayda (BAA) BMTning iqlim o`zgarishi bo`yicha 28-konferensiyasi boshlandi. Keng ko`lamli tadbirda 200 ta davlatdan 70 ming kishi, jumladan, davlat rahbarlari, diplomatik korpus, davlat sektori vakillari, tadbirkorlar, ekspertlar, olimlar, ekologiya faollari, ommaviy axborot vositalari va boshqalar ishtirok etmoqda.
Konferensiya doirasida O`zbekiston qo`shni davlatlar bilan birgalikda global iqlim kun tartibida, jumladan, Markaziy Osiyoda iqlim o`zgarishiga qarshi kurashish masalasida faol ishtirok etmoqda, deya xabar bermoqda Ekologiya, atrof-muhitni muhofaza qilish va iqlim o`zgarishi vazirligi.
Xalqaro tadbir Markaziy Osiyo mintaqasining ovozi va mavqeini mustahkamlashi rejalashtirilgan. Ta`kidlash joizki, O`zbekiston BAAning iqlim o`zgarishiga qarshi kurashda inklyuziv harakatlarni jadallashtirish bo`yicha COP-28 maqsadiga mos keladi va respublika ko`p tomonlama munosabatlarni mustahkamlash va konferensiya muvaffaqiyatli o`tishini ta`minlashda o`z rolini munosib bajarishga tayyor.
Konferensiya Ilmiy va texnologik maslahatlar bo`yicha yordamchi organlar va amalga oshirish bo`yicha yordamchi organ sessiyalarini o`z ichiga oladi. Bundan tashqari, zarurat tug`ilganda maxsus muzokara guruhlari yig`ilishlari o`tkaziladi.
Markaziy Osiyo Orol dengizining qurishi va boshqa ekologik muammolar tufayli iqlimning jiddiy ta`sirini boshdan kechirayotganini inobatga olsak, iqlim o`zgarishi va atrof-muhit degradasiyasi bo`yicha mintaqaviy hamkorlik muhim ahamiyatga ega.
O`zbekiston COP-28 ko`rgazmasida beshta davlatdan iborat yagona Markaziy Osiyo pavilyonining bir qismi sifatida “Bir mintaqa – bir ovoz” pozisiyasini mustahkamlash bo`yicha birgalikdagi sa`y-harakatlarni namoyish etmoqda.
O`zbekiston Markaziy Osiyo milliy pavilyonining ko`k va yashil zonalarida taqdimot qiladi. E`tiborlisi, O`zbekiston birinchi marta YuNESKOning Ekologik ta`lim bo`yicha hamkorligi yig`ilishlarida yashil ta`lim sohasidagi yutuqlarini taqdim etish uchun taklif etildi.
