Adliya vazirligining hay`at majlisida 2023 yilning 9 oyi davomida adliya organlari va muassasalari tomonidan amalga oshirilgan ishlar, yo`l qo`yilgan kamchiliklar va kelgusidagi vazifalar muhokama qilindi. Bu haqda "darakchi.uz"ga vazirlik matbuot xizmati xabar berdi.
Ma`lum qilinishicha, o`tgan davrda Adliya vazirligi tashabbusi bilan 130 ta, shu jumladan 33 ta qonun, 34 ta Prezident hujjatlari, 46 ta Hukumat hujjatlari, 12 ta idoraviy normativ-huquqiy hujjatlar loyihalari ishlab chiqilgan. Kelib tushgan jami 93,4 mingta murojaatlarning 76,3 mingtasi ya`ni 82 foizi qonuniy hal etilgan.
Qonun buzilishi holatlarini bartaraf etish bo`yicha davlat organlari va tashkilotlariga ko`rilgan ta`sir choralar natijasida ularning 8 227 nafar mansabdor shaxslar ma`muriy, 5 438 nafar shaxslar intizomiy javobgarlikka tortilgan.
Jismoniy va yuridik shaxslarning manfaatlarida sudlarga kiritilgan 425 mlrd. so`mlik da`volar (arizalar) qanoatlantirilgan.
Davlat xizmatlarini ko`rsatish markazlari tomonidan esa o`tgan yilning shu davriga nisbatan 14%ga ko`p, ya`ni 9,6 mln. dan ortiq davlat xizmatlari ko`rsatilgan.
Shu bilan birga, sohadagi ayrim muammolar mavjudligi, jumladan, murojaatlar bilan ishlashda ayrim rahbarlarning qat`iyatsizligi va huquqni qo`llash sohasidagi muammolarni hal etishda tizimli yondashuvdagi ayrim kamchiliklar mavjudligi ta`kidlanib, ularning bartaraf qilish bo`yicha tegishli chora-tadbirlar belgilandi. Yig`ilish yakunida, vazir tomonidan bir qator vazifalar belgilab berildi.
