Ayni paytda Prezident Shavkat Mirziyoev raisligida o`tayotgan videoselektor yig`ilishida suv muammosi kun sayin dolzarb bo`lib borayotgani ta`kidlandi. Bu haqda Prezident Matbuot xizmati xabar bermoqda.
So`nggi ikki yilda suv xo`jaligiga, jumladan suv tejovchi texnologiyalarga katta miqdorda subsidiya ajratilgan.
Lekin o`tgan yili iste`mol qilingan 39 milliard kub metr suvning 36 foizi tuproq o`zanli kanal va ariqlarda yo`qolgani ko`rsatib o`tildi.
Bundan tashqari, erlarning 70 foizi eski usulda sug`orilgani bois, 5-6 milliard kub metr suv behuda sarflanib, kollektorlarga tashlanayotgani aytildi.
Bugungi kunda 2,5 million gektar maydonni sug`orish uchun 5 mingdan ziyod nasos ishlatilib, yiliga 7 milliard kilovatt soat elektr sarflanadi. Lekin, 80 foiz nasoslar 35-40 yildan beri ishlatilib, o`z resursini o`tab bo`lgan.
Davlatimiz rahbari suv xo`jaligidagi bunday vaziyatdan chuqur tashvishdaligini qayd etib, soha mutasaddilariga qattiq e`tiroz bildirdi.
Kanallarni beton qilish orqali yo`qotishlarni kamaytirish, nasoslarni energiya tejamkoriga almashtirish, suv inshootlarida avtomatlashgan hisoblagich o`rnatish yuzasidan topshiriqlar berildi.
