AsosiyJamiyat

General Aleksandr Shishlyannikov og`ir kasallikdan keyin 73 yoshida vafot etdi

'General Aleksandr Shishlyannikov og`ir kasallikdan keyin 73 yoshida vafot etdi'ning rasmi

2023 yil 15 sentyabr kuni O`zbekiston Respublikasi Qurolli Kuchlari akademiyasi harbiy ilmiy-amaliy ishlab chiqish markazi katta ilmiy xodimi, harbiy fanlar nomzodi, professor, iste`fodagi general-mayor Aleksandr Vladimirovich Shishlyannikov og`ir kasallikdan keyin 73 yoshida vafot etdi. Bu haqda Mudofaa vazirligi xabar qildi.

A.V.Shishlyannikov 1950 yil 3 noyabrda Toshkent shahrida tug`ilgan.

1971 yil Toshkent oliy tank qo`mondonlik bilim yurtini tamomlagandan so`ng, Chexoslovakiyadagi Markaziy qo`shinlar guruhi va Germaniyadagi G`arbiy qo`shinlar guruhi qismlarida xizmat qilgan. 1993-1995-yillarda Tojikiston Respublikasi mudofaa vaziri lavozimida faoliyat yuritgan.

U butun umrini Qurolli Kuchlar safida xizmat qilishga bag`ishladi.

30 yildan ortiq haqiqiy harbiy xizmati davomida Aleksandr Vladimirovich uning barcha bosqichlarini bosib o`tdi: tank bilim yurti kursantidan tortib, O`zbekiston Respublikasi Qurolli Kuchlari akademiyasining tezkor san`at va umumiy taktika kafedrasi boshlig`igacha, Tojikiston Respublikasining birinchi mudofaa vaziri, leytenantdan-generalgacha.

U 70 dan ortiq ilmiy va uslubiy ishlar muallifi bo`lib, Qurolli Kuchlarning 20 dan ortiq ofiserlariga ilmiy rahbarlik qilgan. 

Ko`p yillik halol, vijdonan xizmati va mehnati uchun Aleksandr Vladimirovich yuksak davlat mukofotlari, jumladan 3 ta orden va 50 dan ortiq medal hamda esdalik nishonlari bilan taqdirlangan. Mamlakatimiz Qurolli Kuchlarining jangovar tayyorgarligini oshirishdagi xizmatlari, harbiy fanni shakllantirish va rivojlantirishga qo`shgan ulkan hissasi uchun 2019 yilda Aleksandr Vladimirovich Shishlyannikov O`zbekiston Respublikasi Prezidenti Shavkat Miromonovich Mirziyoevning farmoniga muvofiq, “Do`stlik” ordeni bilan taqdirlangan.

Aleksandr Vladimirovichni so`ngi manzilga kuzatish bugun, 16 sentyabr kuni soat 11.00 da Chirchiq  oliy tank qo`mondonlik-muhandislik bilim yurti, manzil: Chirchiq shahri, Amir Temur ko`chasi-15 (Toshkent viloyati)da bo`lib o`tadi.

 

    Boshqa yangiliklar