Ijtimoiy tarmoqlarda ko`pqavatli uyning tom qismida maktab o`quvchilari yurganligi haqida video tarqaldi. Chilonzor tumani hokimligi holat yuzasidan ma`lumot berdi.
Qayd etilishicha, Chilonzor tumanidagi “2-Charx Kamolon” mahallasida joylashgan ko`pqavatli uylarning birining tom qismiga 2 nafar maktab o`quvchilari chiqqan.
Mahallada joylashgan 128-umumta`lim maktabining 9 “A”-sinfi o`quvchilari S.M. va M.I.lar atrofni tomosha qilish maqsadida ko`pqavatli uyning tom qismiga chiqqanligi ma`lum bo`ldi.
Tuman hokimligining voyaga etmaganlar ishlari bo`yicha komissiya raisi o`rinbosari A.Hatamov boshchiligida mazkur o`quvchilar va ularning ota-onalari, maktab ma`muriyati, psixolog inspektorlar, tuman hokimligidagi bolalarni himoya qilish shu`ba mas`ullari ishtirokida o`tkazilgan muloqot jarayonida o`quvchilar bu ishni qilganlaridan pushaymon ekanligini aytib kechirim so`rashdi.
"Ota-onalar ham bolalarni bundan keyin qattiq nazorat ostiga olishlarini bildirdi. Maktab ma`muriyati va tuman Bolalarni himoya qilish sho``basi mutasaddilariga S.M va M.I.ga nisbatan qonun doirasida tegishli chora ko`rish topshirildi", - deyiladi xabarda.
