Parkent tumani “Kumushkon” MFYda yashovchi Baxtiyor Jo`lanovga tegishli xonadonning ro`parasi – Birdamlik ko`chasidagi yo`l chetida ichimlik suvi o`tadigan polietilen quvurlarni er ostiga ko`mish uchun qazilganda, erning ustki sathidan 50 sm pastlikdan o`tov shaklidagi bo`shliq ochilib qolgan. Bo`shliqdan to`qqiz dona sopol idishlar topilgan.
Arxeologlar tomonidan ko`rsatilgan joy tekshirilganda balandligi —1.5 – 1.6 m, diametri 1.8 – 1.9 m, ichki shifti gumbaz shaklida bo`lgan er osti qurilmasi qadimiy qabr qo`rg`oni bo`lgani aniqlandi.
Qabrdan olingan sopol idishlar marhumlarni dafn etish chog`ida qabrning chetlariga qo`yib chiqilgan bo`lgan. Ularning barchasi qo`lda, ya`ni kulolchilik charxi yordamisiz yasalgan. Idishlarning ustiga qizg`ish rangdagi suyuq angob (bo`yoq) surtilgan.
O`rganishlarga ko`ra, qabr va undagi topilmalar II-VI asrlarga tegishli bo`lishi mumkin.
