Prezident raisligida sanoat korxonalari barqaror ishlashi uchun tarmoq va hududlarda amalga oshirilayotgan ishlar muhokamasiga bag`ishlangan videoselektor yig`ilishi boshlangani haqida xabar bergan edik.
Prezidentimiz yig`ilishda o`tgan etti oyda yurtimizda sanoat mahsulotlari hajmi 5,7 foizga o`sib, 345 trillion so`mga etganini ta`kidladi.
Bu ko`rsatkich elektrotexnika sanoatida 46 foizni, engil avtomobillar ishlab chiqarishda 16 foiz, qurilish materiallarida 12 foiz, tayyor kiyim-kechak ishlab chiqarishda 11 foizni tashkil qilib, yuqori sur`atlarda o`sdi.
Misol uchun, misni qayta ishlash 30 foizga va yuqori qo`shilgan qiymatli maishiy texnikalar hajmi 36 foizga oshishi hisobiga jami 12,5 trillion so`mlik elektrotexnika mahsulotlari ishlab chiqarildi. Ularning eksporti 25 foizga ko`payib, 550 million dollardan oshdi.
Joylarda ishlar to`g`ri yo`lga qo`yilgani bois 25 ta tuman va shaharda sanoat hajmi 10 foizdan ko`paygan.
Bo`zatov, Kegeyli, Qo`ng`irot, Xo`jayli, Andijon, Olot, Shofirkon, G`allaorol, Kitob, Nishon, Konimex, Chortoq, Oqdaryo, Bulung`ur, Ishtixon, Paxtachi, Oltinsoy, Bandixon, Boysun, Qiziriq, Parkent, Buvayda, Uchko`prik tumanlari, Kattaqo`rg`on va Nurafshon shaharlarida sanoat yuqori sur`atda o`sgan.
Jumladan, to`qimachilik korxonalarini ko`paytirish orqali, sanoat ko`rsatkichini Bandixon 45 foizga, Qiziriq 18 foiz, Olot va Buvayda 15 foizdan, Kegeyli 14 foiz, Oqdaryo va Boysun 13 foizdan, Andijon tumani 10 foizga oshirgan.
Shuningdek, mavjud konlarni o`zlashtirib, qurilish materiallari ishlab chiqarishni kengaytirish hisobiga sanoat hajmi Kitobda 19 foizga, Qo`shrabotda 10 foizga o`sgan.
Umuman, yil boshidan respublika bo`yicha 2 mingta yangi sanoat loyihasi ishga tushirilib, yil yakunigacha qo`shimcha 1 trillion so`mlik mahsulot ishlab chiqarish imkoni yaratildi.
Misol uchun, “Pistali” oltin konida yangi metallurgiya zavodini muddatidan oldin ishga tushirish hisobiga shu yil qo`shimcha 840 milliard so`mlik mahsulot ishlab chiqariladi.
Zavoddagi qariyb 50 million dollarlik uskunalar sanoat kooperasiyasi asosida o`zimizda ishlab chiqarilgan. Bu ham sanoat hajmini oshirishga qo`shimcha turtki bo`ldi.
Shu bilan birga, 34 ta tuman va shaharda sanoat mahsulotlari ishlab chiqarish hajmi o`tgan yilga nisbatan pasaygan. Ayrim tarmoqlarda, shu jumladan farmasevtika, charm-poyabzal, to`qimachilik sanoatida ishlab chiqarish va eksport ko`rsatkichlarining o`sish sur`ati sekinlashgan.
