O`zbekistonda tug`uruq o`rinlari soni 2023-2027 yillarda 4 321 taga oshiriladi

“Onalar va bolalar salomatligini muhofaza qilish, aholining reproduktiv salomatligini mustahkamlash chora-tadbirlari to`g`risida”gi Prezident qarori qabul qilindi. Bu haqda Huquqiy axborot xabar bermoqda.
 Qarorga ko`ra, 2023 yil 1 oktyabrdan Respublika ixtisoslashtirilgan ona va bola salomatligi ilmiy-amaliy tibbiyot markazi hamda uning 14 hududiy filiali tashkil etiladi.
 Birlamchi tibbiyot-sanitariya yordami muassasalarida “tibbiyot brigadalari”:
- o`zlariga biriktirilgan hududlarda homilador ayollarni aniqlaydi, ularni hisobga olish va davriy tibbiy ko`rikdan o`tishini tashkil etadi;
- homilador ayollar holatini doimiy monitoring qilib boradi;
- tug`uruqdan keyingi davrda ona va bolaning davriy patronajini olib boradi;

 Markazning hududiy filiallari:
- xavf omillari aniqlangan ayollarni tibbiy tekshiruvdan o`tkazadi, ularni davolaydi;
- irsiy kasalliklar aniqlangan bolalarni maxsus dori vositalari va oziq-ovqat mahsulotlari bilan ta`minlaydi;

 Respublika perinatal markazi:
-erta tug`uruq xavfi bo`lgan homiladorlarga, shuningdek, muddati etmasdan (22-28 haftalik) tug`ilgan chaqaloqlarga barcha turdagi tibbiy xizmatlar ko`rsatadi;
 Markaz:
- homilador ayollar va yangi tug`ilgan bolalar skriningi bo`yicha ixtisoslashtirilgan hamda yuqori texnologik diagnostika va davolash amaliyotlarini joriy etadi;
- akusherlik-ginekologiya, tibbiy-genetik maslahat, sog`lom oilani rejalashtirish, molekulyar-genetik tekshiruv, plastik va estetik ginekologiya, yordamchi reproduktiv texnologiyalar xizmatlarini tashkil etadi.
2023 yil 1 oktyabrdan birlamchi tibbiyot-sanitariya yordami muassasalarida mutaxassislarni joriy etilayotgan yangi tizim bo`yicha o`qitish yo`lga qo`yiladi. 
 2024 yil 1 oktyabrdan har yili 100 tagacha imtiyozli toifaga kiruvchi shaxslarga yordamchi reproduktiv texnologiyalar usullari muvaffaqiyatli qo`llanganda ushbu amaliyotni amalga oshirish bilan bog`liq xarajatlar qoplab beriladi.
 Qaror bilan shuningdek, Onalar va bolalar hamda aholi reproduktiv salomatligini muhofaza qilish xizmatini yanada rivojlantirish bo`yicha chora-tadbirlar dasturi tasdiqlandi.
Dasturga ko`ra, homilador ayollar uy varaqasini raqamlashtirish va amaliyotga joriy etish nazarda tutilgan. 
2023–2027 yillarda tug`uruq o`rinlari soni jami 4 321 taga oshiriladi.