AQSh prezidenti Jo Bayden saylovlarga chet ellarning aralashuvi tahdidi sababli mamlakatdagi favqulodda holat rejimini yana bir yilga uzaytirdi, deb xabar qildi Oq uy.
“Amerika Qo`shma Shtatlaridagi saylovlarga chet el aralashuvi tahdidi yoki jamoatchilikning ishonchini susaytirishi munosabati bilan 13848-sonli ijroiya tartibidagi favqulodda holatni bir yilga uzaytiraman”, dedi prezident Oq uy nashrida e`lon qilingan bayonotda.
Unda qayd etilishicha, favqulodda holat 2018 yil 12 sentyabr kuni “milliy xavfsizlikka noodatiy va favqulodda tahdid” tufayli saylovlarga chet ellarning aralashuvi xavfi tufayli e`lon qilingan.
Shu bilan birga, Bayden “biron bir xorijiy kuch Amerikada o`tkazilgan birorta saylovda natijalar yoki ovozlar hisobini o`zgartirgani haqida hech qanday dalil yo`qligini” tan oldi. Biroq, uning so`zlariga ko`ra, "xorijiy kuchlar tarixan Amerikaning erkin va ochiq siyosiy tizimidan foydalanishga intilgan" va bu kabi urinishlar "AQSh milliy xavfsizligi va tashqi siyosatiga noodatiy va favqulodda tahdid solishida davom etmoqda".
