Biz ayrim mamlakatlar kabi neft-gaz resurslarini sotish hisobiga yuqori iqtisodiy o`sishni ta`minlay olmaymiz — Prezident

O`rta korxonalar faoliyatini kengaytirishi uchun ularga yangi investor va brendlarni jalb qilishga ko`maklashish zarur. Shu bois, agar korxona xorijiy brend va investor bilan kelishuvga erishsa, unga yangi tashkil qilingan Sanoat jamg`armasi 25 foizigacha kapitaliga sarmoya bilan kirishi mumkin bo`ladi. Bu haqda Prezident Matbuot xizmati xabar bermoqda.

Tadbirkorlik jamg`armasi iqtisodiyotning yana bir drayveri bo`lgan xizmatlar sohasiga mas`ul bo`ladi. Jamg`armaga salohiyatli o`rta biznes korxonalariga ulushdor bo`lib kirish vakolati beriladi. Buning uchun joriy yilda jamg`armaga qo`shimcha 25 million dollar, kelgusi yilda yana 100 million dollar ajratiladi.

Shu bilan birga jamg`arma tomonidan o`rta biznes uchun xorijiy valyutadagi kreditlarga ham kafillik beriladi.

Jamg`arma turizm, savdo va servis sohalarida “xizmatlar ipotekasi” tizimini joriy qiladi. Endi mehmonxona, restoran, savdo kompleksi, avtoturargoh, yoqilg`i shoxobchasi, kemping kabi ob`ektlarning tayyor loyihalari tadbirkorlarga taklif etiladi.

Shuningdek, jamg`arma tadbirkorlarga xizmat ko`rsatish ob`ekti uchun er sotib olish, bino-inshootlar qurish va aylanma mablag`i uchun ham resurs ajratadi.

Bu ikkita yangi tizim 1 oktyabrdan to`laqonli ishga tushiriladi va kelgusi bir yilda o`rta biznesda sanoat sohasida 2 mingta va xizmatlarda 10 mingta yangi loyihalar moliyalashtiriladi.

Ushbu yangi imkoniyatlar hisobidan qo`shimcha 1 milliard dollarlik xizmatlar ko`rsatish, 5 milliard dollarlik mahsulotlar ishlab chiqarish, 350 ming yangi ish o`rinlarini tashkil qilish mumkin bo`ladi.

Prezident yangi bozorlarga sifatli va raqobatbardosh mahsulot bilan kirish masalasiga to`xtaldi.

“Bir narsani to`g`ri tushunish kerak. Biz ayrim mamlakatlar kabi neft-gaz resurslarini sotish hisobiga yuqori iqtisodiy o`sishni ta`minlay olmaymiz.

Bizning “neftimiz” ham, “gazimiz” ham bu – siz kabi tashabbuskor va ishbilarmon tadbirkorlar xom ashyoddan yaratayotgan yuqori qiymatli va sifatli mahsulotlardir”, - dedi davlatimiz rahbari.

Mahsulotlar tashqi bozorlarda sifatli, talabgorligi yuqori va raqobatbardosh bo`lishi uchun ishlab chiqarishni mutlaqo yangi bosqichga olib chiqib, keskin o`sish qilish zarurligi ta`kidlandi.

Xalqaro maydondagi vaziyat hisobiga logistika xarajatlari 3-4 baravar oshib ketganini hisobga olib, davlat eksportchi korxonalarni qo`llab-quvvatlashni izchil davom ettiradi. Ular uchun moliyaviy imkoniyatlar yanada kengaytiriladi.

Logistika xarajatlarini kompensasiya qilishga qo`shimcha 100 million dollar yo`naltiriladi. Shuningdek, mahsulotlarni xorijda sertifikatlash, xalqaro standartlarni joriy qilish va bu borada mutaxassis tayyorlashga yana 25 million dollar ajratiladi.

“Yangi O`zbekiston – raqobatbardosh mahsulotlar yurti” dasturi joriy yilda ham davom ettiriladi va dastur bilan qamrab olinadigan korxonalar soni 500 taga etkaziladi. Ular uchun dasturdagi barcha imtiyozlar davom ettiriladi.