Qozog`iston Xitoy va Eron yo`nalishida neft eksporti yo`nalishlarini rivojlantirish niyatida. Bu haqda respublika energetika vaziri Bolat Oqchulakov ma`lum qildi, deya xabar beradi Inbusiness.kz.
Mulozimning ta`kidlashicha, bunday chora neft eksportining muqobil yo`nalishlarini rivojlantirish bo`yicha “Yo`l xaritasi” loyihasida mavjud.
“Shunday qilib, asosiy e`tibor Ozarbayjon, Gruziya va Turkiya portlari yo`nalishi bo`yicha Transkaspiy xalqaro transport yo`nalishini, shuningdek, Xitoy va Eronga eksport yo`nalishlarini rivojlantirishga qaratiladi”, - dedi Akchulakov.
Bugungi kunda Qozog`iston o`z neftining qariyb 80 foizini Kaspiy quvurlari konsorsiumi (CPC) orqali Qora dengizdagi Rossiya portiga eksport qilish uchun yuborar edi. O`tgan yozda respublika prezidenti Qosim-Jomart Tokaev hozirgi geosiyosiy vaziyat bilan bog`liq holda neft etkazib berishni diversifikasiya qilishga chaqirdi. O`shandan beri respublika xomashyoni Rossiya Federasiyasini chetlab o`tib eksport qilish masalasini bir necha bor ko`tardi.
2021 yil oxirida Qozog`iston Xitoyga 1,9 milliard dollarlik xom neft va neft mahsulotlarini eksport qilgan (yil oxirida respublika 31,1 milliard dollarlik neft eksport qilganiga qaramay). Eronga kelsak, avvalroq Qozog`iston SWAP sxemasi bo`yicha Islom Respublikasiga neft jo`natgan. Yoqilg`i Qozog`istonning Aktau portidan Eronning shimoliy portlariga tankerlar orqali etkazilgan, u erdan esa Eronning Tabriz va Tehrondagi neftni qayta ishlash zavodlariga jo`nagan. O`z navbatida Eron ham xuddi shunday miqdordagi neftni Fors ko`rfazidagi tankerlarga jo`natgan.
Transkaspiy xalqaro transport yo`nalishi Xitoy, Qozog`iston, Kaspiy dengizi, Ozarbayjon, Gruziya va undan keyin Evropa mamlakatlariga o`tadi. Aslida, bu loyiha Xitoydan Evropaga tovarlarni etkazib berish uchun Rossiya Trans-Sibir temir yo`liga muqobildir. Marshrutga ko`ra, avvalroq Qozog`iston tomoni ta`kidlaganidek, yiliga 10 million tonnagacha yuk, jumladan, 200 mingtagacha konteyner tashish mumkin.
