Andijon viloyatining Asaka tumanida 24 yoshli ayolning jasadi o`z xonadonidan qotillik alomatlari bilan topilgan. Bu haqda Bosh prokuratura matbuot xizmati Darakchi.uz’ga xabar berdi.
Ma`lum qilishinicha, qotillik 5 dekabr kuni kuni tumanning "Arg`in" mahallasida sodir bo`lgan.
Jinoyat ishi bo`yicha olib borilgan tergov harakatlari hamda tezkor-qidiruv tadbirlari natijasida mazkur qotillik jinoyati marhumaning turmush o`rtog`i Ch.B. tomonidan sodir etilgani aniqlangan.
Fuqaro Ch.B. 5 dekabr kuni soat 11:40 larda o`z uyida turmush o`rtog`i D.B. bilan oilaviy kelishmovchilik tufayli o`zaro janjallashib qolgan. Janjal vaqtida uning yuz va bosh qismlariga obdasta bilan bir necha marotaba qasddan urib o`ldirgan. Obdastadagi qon dog`larini yuvib, tozalab, so`ngra uyidan chiqib ketgan.
29 yoshli erkak Shahrixon tumani hududida qurilishi bitmagan binoda yashirinib, 7 dekabr kuniga o`tar kechasi soat 03:30 larda o`z uyiga qaytgan vaqtida ushlangan.
Oilaning ikki nafar farzandi bor.
Holat yuzasidan Jinoyat kodeksining 97-moddasi (qasddan odam o`ldirish) 1-qismi bilan jinoyat ishi qo`zg`atilgan.
