Hukumat qarori bilan engib bo`lmaydigan kuchlar (fors-major) holatlarini tasdiqlash bo`yicha davlat xizmatlarini ko`rsatishning ma`muriy reglamenti tasdiqlandi. Bu haqda Huquqiy axborot Telegram kanali xabar berdi.
Ma`lum qilinishicha, reglament bilan tashqi savdo bitimlari, xalqaro moliya yoki investisiya kelishuvlari va xalqaro shartnomalar shartlariga muvofiq O`zbekistonda boshlangan yoki bo`lib o`tgan engib bo`lmaydigan kuchlar holatlarini tasdiqlash bo`yicha davlat xizmati ko`rsatish tartibi belgilandi.
Unga ko`ra, fors-major holatlari vakolatli shaxsning elektron raqamli imzosi bilan tasdiqlangan hamda QR-kod bilan rasmiylashtiriladigan elektron shakldagi sertifikatni berish orqali tasdiqlanadi.
Shuningdek, talabgorga sertifikat berish yoki berishni rad etish to`g`risidagi qaror vakolatlari organ tomonidan so`rovnoma qabul qilingan kundan boshlab 13 ish kunida qabul qilinadi.
Sertifikat olish uchun talabgor quyidagi hujjatlarni taqdim etadi:
- shartnoma, qo`shimcha kelishuv hamda ularning spesifikasiya nusxalarini;
- shartnoma bo`yicha bajarilgan majburiyatlarning hajmlarini tasdiqlovchi hujjatlarni.
Talabgordan boshqa ma`lumot va hujjatlarni talab qilish qat`iyan taqiqlanadi.
Shuningdek, sertifikat berish uchun BHMning 90 foizi (270 ming so`m) miqdorida yig`im undiriladi. Sertifikat muddatsiz davrga beriladi.
